केएफसीको मासु ‘खान अयोग्य’, धादिङमै खाल्डोमा पुरियो

किसानले नियन्त्रणमा लिंदा झडप

३० मंसिर, काठमाडौं । काठमाडौंमा रहेको अन्तराष्ट्रिय चेन रेष्टुरेन्ट केएफसीले खानका लागि अयोग्य कुखुराको मासु प्रयोग गर्ने गरेको खुलेको छ ।

भारतबाट ल्याएको दुई कन्टेनर कुखुराको मासु धादिङ धार्केका किसानले नियन्त्रणमा लिएपछि पशु सेवा विभागको टोलीले जाँच गर्दा खानका लागि अयोग्य भएको प्रमाणित भएको हो ।

पशु सेवा विभागका उप-महानिर्देशक रामकृष्ण खतिबडाको नेतृत्वमा गएको टोलीले मिति उल्लेख नभएको र खानका लागि अयोग्य रहेको भन्दै नष्ट गरेको छ । कुखुराको मासु बोकेर आइरहेको एम एच ४३ यु ४३३७ र डि एल १ एम ६५८२ नम्बरका भारतीय कन्टेनरलाई किसानले शनिबार बिहान चालिसे बजारमा नियन्त्रणमा लिएर प्रहरीलाई बुझाएका थिए ।

प्रहरीले मासु नष्ट गर्न नमानेपछि आक्रोसित स्थानीयबासी तोडफोडमा उत्रिएका थिए । त्यसक्रममा प्रहरीले अश्रु ग्याँस प्रहार गर्दै र लाठी चार्ज गरेको थियो । त्यसक्रममा ३ जना किसान घाइते भएका छन् । ‘स्थानीयबासीले तोडफोड गर्न थालेपछि केहीबेर अवस्था असामान्य बनेको हो’ धादिङका प्रहरी प्रमुख विकासराज खनालले अनलाइनखबरसँग भन्नुभयो । पशु विभागको टोली र स्थानीयबासीको चर्को दबावपछि प्रहरीले करिव ५५ क्विन्टल मासु खाल्डो खनेर गाडेको छ ।

तीन वर्षअघि काठमाडौंमा खुलेको केएफसीले नेपालको मासु मापदण्ड नपुग्ने भन्दै थाइल्याण्डबाट ल्याउने बताउँदै आएको थियो । तर, धादिङको घटनाले भारतबाट ल्याउने गरेको खुलेको छ ।

समाचार

• बुद्धजयन्तीले प्रेमको सन्देश फैलाओस्ः राष्ट्रपति
• भीषण दिनहरु…..
• चुनावी अवरोध हटाउन दलहरुलाई राष्ट्रसंघ महासचिवको आग्रह
• पुस्तक मेला- कुन किताब कस्ता छन् ?
• संस्मरण/खलंगामा हमला