हासमीलाई कसले लगायो आगो ?

हासमीका दाजु भन्छन्- 'हामी पीडितलाई झन् पीडित बनाइयो'

आरपी सुवेदी

८ पुस, काठमाडौं । शरीरमा पेट्रोल छर्केर आगो लगाइएपछि उपचार गर्दागर्दै निधन भएकी बर्दिया, गुलरिया-८ की शिवा हासमीबारे अनलाइनखबरले गरेको खोजबाट केही रहस्यहरु फेला परेका छन् ।

गत मंसिर २२ गते बिहानै साढे ६ बजेतिर १९ वर्षीया हासमीको शरीरमा आगो लागेको थियो । स्थानीय अस्पतालमा उपचार हुन नसकेपछि काठमाडौं ल्याई वीरअस्पतालमा उपचार गराइँदै गर्दा मंसिर २७ गते हासमीको निधन भएको थियो ।

हासमीका प्रेमी भनिएका छिमेकी बाबु खानले पेट्रोल छर्केर आगो लगाएको भन्दै परिवारको आग्रहमा प्रहरीले खानलाई नियन्त्रणमा लिएर थुनामा राखेको छ । तर, हासमीलाई आफ्नै परिवारका सदस्यले आगो लगाएको आशंका बढेको भन्दै बर्दिया प्रहरीले हासमीकी आमा र दाजुलाईसमेत पक्राउ गरेको छ । कमल थापा नेतृत्वको राप्रपा नेपालसमर्थित युवासंघका केन्द्रीय सदस्यसमेत रहेका हासमीका अर्का दाजु रिजमान हासमीलाई भने प्रहरीले अझै फेला पार्न सकेको छैन । रिजमान राप्रपा नेपालको संरक्षणमा रहेको बुझिएको छ ।

घटनास्थलको प्रकृति

बर्दियाको जिल्ला प्रहरी कार्यालयभन्दा लगभग ५ सय मीटरमात्रै टाढा रहेको छ हासमीको घर । मुस्लिम टोलका रुपमा चिनिने यस गाउँमा कच्ची बाटोले छुट्याएको अवस्थामा शिवा हासमी र बाबु खानको निवास आमने-सामनेमा रहेको छ । हासमी आफ्नै एक तले पक्की घरमा बस्थिन् भने बाबु खानको परिवार अर्काको स्वामित्वमा रहेको सानो छाप्रोमा बस्दै आएको छ । हासमीको घरसँगै अन्य घरहरु पनि टाँसिएर बनाइएकाले हासमीको घरपछाडिको कम्पाउन्डमा हासमीकै घरभित्र भएर मात्रै जान सकिन्छ । प्रत्यक्षदर्शीहरुका अनुसार बिहान साढे ६ बजेतिरै हासमी शरीरमा आगो लिएर घर पछाडिको कम्पाउन्डमा दौडिएकी थिइन् । सोही कम्पाउन्डमा ढलको फोहोरमा लडेर उनले आफ्नो शरीरको आगो निभाउने प्रयास गरेकी थिएन् । (तस्वीरमा काठले छोपिएको ठाउँमा ढलको फोहोर देखिन्छ, जहाँ हासमी आगोको मुस्लोसहित लडेकी थिइन् ।)

घरपछाडि कम्पाउन्डको भित्रपट्टी एकातिर काँचो ईंटाले बनेको कमजोर पर्खाल देखिन्छ, जसको छेउमा एउटा प्लाष्टिकको बट्टासमेत छ । यही ठाउँबाट बाबु खानले हासमीलाई पेट्रोल छर्केर आगो लगाएको हासमीका परिवारको दाबी छ । तर, उक्त पर्खाल बाहिरपट्टी ढलको पानी जमेको धाप रहेकाले त्यहाँ मान्छे हिँड्न सम्भव नरहेको र पक्राउ परेका बेला बाबु खानको शरीरमा हिलो नलागेको स्थानीयवासीको तर्क छ ।

बाबुले जहाँबाट पेट्रोल छर्किए भनिएको छ, त्यो ठाउँबाट हासमी लडेको ढलको पानी नजिकै रहेको छ । बिहान ६ बजे नै पर्खालको छेउमा आएर कसैले पेट्रोल खन्याउँदा र आगो लगाउँदा हासमी तत्कालै ढलमा गएको हुनुपर्ने र त्यसो गर्दा उनी ५ प्रतिशत जतिमात्रै जल्ने विश्लेषण स्थानीयहरु गर्छन् । आगो लगाइएको धेरैबेरमा मात्रै उनी ढलको पानीसम्म आइपुगेको देखिन्छ । ढलको छेउमै हाते कल थियो । घरमा पनि पानी राखिएको अवस्थामा परिवारका सदस्यले तत्कालै पानी खन्याएको भए उनी यतिधेरै नजल्ने घटनास्थलको प्रकृतिलाई हेर्दा प्रष्ट हुन्छ । हासमीको घर एक तलेमात्रै भएकाले कुनै पनि कोठामा वा बाहिर भएको गतिविधि थाहा नपाउने स्थिति देखिँदैन । त्यसबेला हासमीका घरमा हासमीका बुबा मात्रै थिएनन्, अन्य सदस्यहरु घरमै थिए । एउटा मोटरसाइकल पनि पार्किङ गरिउको र कोही पाहुना आएको तर, बिहाने र्फकेको केहीले दाबी गरेका छन् ।

तर, चार दाजुभाइकी एक्ली बहिनी र बाबु-आमाकी एक्ली छोरीलाई कसरी आफ्नै परिवारले जिउँदै आगो लगाए भनेर विश्वास गर्ने ? यो प्रश्न पनि कम जटिल छैन ।

हासमी बेलाबखत बाबुको घरमा छिर्थिन्

भारतमै एसएलीसम्म पढेकी १९ वर्षीया हासमी कहिले दाल या केही चिज माग्ने निहुँले आफ्नै  घर सामुन्ने रहेको बाबु खानकोछाप्रोमा फुत्त छिर्थिन् । जिल्ला प्रहरी कार्यालय अगाडि हासमी परिवारको कस्मेटिक पसल थियो । वर्गीय धरातल हासमीको भन्दा आरोपी बाबु खानको केही कमजोर देखिन्छ । बाबु खानका बाबु छापाखानामा काम गर्छन् ।

हासमीमाथि आगो लाग्नुभन्दा दुई दिन पहिले हासमीका परिवारले बाबु खानलाई प्रहरी कार्यालयमा पुर्‍याएका थिए । अबदेखि हासमीसँग फोन, एसएमएस वा भेटघाट नगर्ने शर्तमा प्रहरीले उनलाई छाडेको थियो ।

स्थानीयवासीको तर्क

नगरकै एक स्थानीयले जिल्ला प्रहरी कार्यालय बर्दियामा परिवारका सदस्यविरुद्ध किटानी जाहेरी दिएका हुन् । जाहेरीपछि प्रहरीले शिवाकी आमा हसिना हासमी र दाजु शुद्ध हासमीलाई मंगलबार नियन्त्रणमा लिएको हो ।

शिवाको परिवार विरुद्ध जाहेरी दिएका स्थानीय आरिस अहमद राइनले भन्छन्- ‘शिवा र बाबु खानबीचको मोबाइल सम्ंवाद सुन्दा शिवाको हत्या बाबु खानबाट नभई परिवारबाटै भएको भन्ने लागेकाले किटानी जाहेरी दिएका हौं ।’

घटनाअघि बाबु खान र शिवाबीच भएको कुराकानीको मोबाइल रेकर्डसमेत प्रहरी कार्यालय र  अधिकारकर्मीलाई बुझाएको दाबी राइनले गरेका छन् । तर, सो फोन सम्वादलाई प्रहरीले प्रामाणिक मान्ने आधार नरहेको भन्दै अस्वीकार गरेको छ । राइनका अनुसार फोन संवादमा शिवाले आफुलाई परिवारका सदस्यले मार्ने योजना बनाएको र परिवारबाट आफुलाई खतरा रहेको भन्दै आफुलाई तुरुन्त बिहे गरेर भगाउन अनुरोध गरेकी थिइन् । शिवाको भनिएको संवादको रेकर्ड उद्धृत गर्दै राइन भन्छन्-’मलाई दिनहुजसो घरकाले कुट्छन् । तिमीलाई पनि छाड्दैनौं भन्छन् । मलाई डर लागिरहेको छ । मेरो हत्या गरेर तिमी (बाबु खान) लाई फसाउने योजना बनाइरहेका छन् । तिमी मलाई लिएर भागी हाल ।’

शिवाको हत्या हुनुअघि प्रेमी बाबुबीच करिव १५ मिनेट मोबाइलमा सम्वाद भएको दाबी गरिएको छ । तर, कुन नम्बरको टेलीफोनबाट यो सम्वाद भएको भन्ने प्रमाण देखाउन नसकेसम्म यो संवाद बनावटी हो कि भन्ने प्रश्न स्वयं प्रहरीले नै उठाइरहेको छ ।

घटनाकी प्रत्यक्षदर्शी छिमेकी शिखा मण्डल आफू बिहान दाँत माझ्न धारामा गएका बेला शरीरमा दन्किइरहेको आगोसँगै कराउँदै घरभित्रबाट हासमी बाहिर निस्केको र आगोबाट बच्न घरको पर्खालअगाडि ढलमा लडेको बताउँछिन् । शिवा घरबाट बाहिर आँगनमा निस्कँदासम्म उनको शरीरमा आगो दन्किरहेको शिखा बताउँछिन् ।

त्यस्तै अन्सारी थरकी अर्की छिमेकी बिहानै घरको बीच कोठाबाटै आगोको मुस्लोसहित बचाऊ बचाऊ भन्दै हासमी बाहिर भागेको आफुले देखेको बताउँछिन् । उनी भन्छिन्- ‘अगाडिको ढोका बन्द थियो, त्यसैले उसको आवाज सुने पनि केही गर्न सकिँन । तर, उसका घरका मानिसहरु घरमै थिए । ऊ दौडेर घरपछाडिको हिलो खाल्टोमा खसेकी हो ।’

स्थानीयबासीहरु बाहिरको ब्यक्तिले शिवाको घरमा गएर आगो लगाउने अवस्था नभएको बताउँछन् । बाबु खानकी आमा बेबी खान र बहिनी सीमा खान घटना भएका बेलामा बाबु घरमै सुतिरहेको दाबी गरेका छन् । घरपरिवारकै मिलोमतोमा शिवालाई पेट्रोल छर्केर आगो लगइएको र हत्याको आरोपित बाबु खान निर्दोष रहेको भन्दै स्थानीयबासीले मंगलबार जिल्ला प्रहरी कार्यालय घेराऊसमेत गरे । स्थानीयबासीले हत्याको निश्पक्ष छानबिन हुनु पर्ने माग गरेका छन् ।

के भन्छ हासमी परिवार ?

हासमीको परिवारका सदस्य तथा शिवाका दाजु तनवीरले स्थानीयबासीहरुले पीडितलाई झनै पीडित बनाउन थालेको गुनासो गरेका छन् । उनले किटानी जाहेरीमा परेका भाइ रिजवानको राजनीतिक छवि सिध्याउन दुश्मनहरु लागेको अनलाइनखबरलाई बताए । वारेन्ट काटिएका रिजमान राप्रपा नेपालको भातृ संगठन युवक संघका केन्द्रीय नेता हुन् । पार्टीको कामका लागि भन्दै काठमाण्डौमा रहेकाले उनी प्रहरीको नियन्त्रणमा नआएको तनवीर बताउँछन् ।

दुबै कोणबाट अनुसन्धानहुँदैछ -प्रहरी

बर्दिया प्रहरी प्रमुख एसपी शाहले घटनाको दुबै कोणबाट अनुसन्धान भइरहेको बताए । उनले भने, ‘हामी अनुसन्धान गर्दैछौं । जो कोही भए पनि दोषी उम्कन पाउँदैनन् ।’

नाम (अनिवार्य)

इमेल (अनिवार्य) (गोप्य राखिनेछ)

वेबसाइट

प्रतिक्रिया

रद्द गर्नुहोस्

समाचार

• निर्वाचन घोषणा गर्न सरकार आतुरः रेग्मी
• मंसिरमा निर्वाचन नभए सरकारको अस्तित्व सकिन्छः एमाओवादी प्रवक्ता
• कीर्तिमानी आरोही गौतम भन्छन्-सगरमाथा कालो पहाडजस्तो देखें
• नागदह नियाल्दा (फोटोफिचर)
• तालिबानी आक्रमणमा काबुलमा नेपाली मारिए