खेल्ने हातलाई जालीले छेकेन (फोटो फिचरसहित)

आरपी सुवेदी

१० पुस, बझाङ । बझाङको भोपुरमा रहेको सत्यवादी उमाविको कक्षा ८ र ९ मा अध्ययनरत् छात्राहरुले भलिबल खेल्ने आफ्नो मनको धोको पूरा गर्न रमाइलो जुक्ति निकालेका छन् ।

भलिबल खेल्न रहर लागे पनि माथिल्लो कक्षाका विद्यार्थीहरुले मौका नदिएकाले उनीहरुले नयाँ उपाय निकालेका हुन् । छात्राहरुले विभिन्न पर्वहरुमा टीकोटालो गरी जम्मा पारेको दक्षिणाबाट जोगाएको पैसाले भलिबल त किने । तर, नेट -जाली) किन्न पैसा पुगेन । तैपनि ‘खाने मुखलाई जुँगाले छेक्दैन’ भनेझैं उनीहरुले जालीकै अभावमा भलिबल खेल्ने आफ्नो ईच्छालाई दबाएनन् । बरु, आफूहरुले ओढ्ने गरेको दुपट्टा (सल) जोडेर दुबै पोलमा बाँधे, अनि थाले भलिबल खेल्न ।

घरको कामधन्धा र विद्यालयको गृहकार्य सकेर उनीहरु दैनिक २ घण्टा भलिबल खेल्छन् । कक्षा ९ सेक्सन ए मा अध्ययनरत छात्रा रोशनी बोहरा औंशी, पूणिर्मा, सक्रान्ति, दशैं र तिहारमा टीकोटालो गर्दा पाएको दक्षिणाको पैसा संगालेर साढे ४ सयमा नजिकैको चैनपुर बजारबाट भलिबल किनेको बताउँछिन् ।

‘खेल्ने ईच्छा छ, सक्छौं भन्ने पनि छ, तर मौका र सुविधा नै पाउदैनौं ।’ बोहराले भनिन्-’कसरी हामीजस्ताको खेल्ने चाहाना पूरा होला त ?’

कक्षा-८ मा अध्ययनरत सुशीला खाती र सुनिता जोशी अनि कक्षा-९ एमा अध्ययनरत कमला जोशी अब आफूहरुले पनि सिनियर टिमसंग भिड्न सक्ने क्षमता बनाएको बताउँछन् । ‘भलिबल किने पनि जाली किन्ने पैसा नभएकाले आफ्नै दोपट्टा बाँधेर जाली बनाई दुई टिममा बाँडिएर खेल्ने गरेका छौं’-उनीहरुले एकै स्वरमा रमाउँदै भने ।

‘सुविधा सम्पन्न ठाँउमा खेल सामाग्री दिने र उपलब्ध गराउनेहरुको होडबाजी हुने तर, हाम्रोजस्तो विकट ठाँउमा त्यस्ता सहयोगी हात नआउने रहेछन्’-बोहराले भनिन् । उनले अवसर र मौका पाए आफूमा रहेको प्रतिभा देखाउन पछि नपर्ने बताइन् ।

समाचार

• काँग्रेस नेपालको नम्बर वान पार्टी हो : थापा
• मंगलबार सुनको मूल्य १६ सय रुपैयाँ बढ्यो
• माथिल्लो तामाकोशीको सुरुङभित्र पस्दा… (फोटोफिचर)
• राप्रपा महाधिवेसनमा मतगणना हुँदै
• लोकमानसिंहले टंगालबाटै सरकार चलाउन थाले !