अब बिरामीले निःशुल्क रगत पाउने

१४ पुस, काठमाडौं । अब निःशुल्क रक्तदान भएजस्तै निःशुल्करुपमा रगत पनि पाइने भएको छ । नेपाल रेडक्रस सोसाइटीद्वारा सञ्चालित रक्तसञ्चार सेवा केन्द्रहरुले निःशुल्करुपमा प्राप्त भएका रगत भण्डारणलगायत अन्य प्राविधिक काम भन्दै हाल प्रतियुनिट रु ५१० लिँदै सम्बन्धित बिरामीलाई सिफारिसका आधारमा वितरण गरिराखेको छ ।

स्वास्थ्य तथा जनसङ्ख्या मन्त्रालयले रक्तदाताहरुबाट निःशुल्करुपमा प्राप्त भएका रगत बिरामीले पनि निःशुल्क पाउन् भन्नाका लागि पहिलोपटक नीतिगत व्यवस्था गर्न लागेको हो । मन्त्रालयका चिकित्सा महाशाखाका प्रमुख एवम् कामु सचिव प्रा डा तीर्थप्रसाद बुर्लाकोटीले ब्लड डोनर्स एसोसिएसन नेपाल -ब्लोदान)को १६ औँ साधारणसभाको उद्घाटन गर्दै छिट्टै नीतिगत व्यवस्था गरिने जानकारी दिनुभयो ।

मन्त्रालयले विसं २०४८ बाट ब्लड बैंक सञ्चालनको जिम्मा नेपाल रेडक्रस सोसाइटीलाई दिएको थियो । भनेको समयमा बिरामीले खोजेको रगत नपाउने, निःशुल्करुपमा प्राप्त भएका रगत पनि शुल्क तिरेरमात्र बिरामीले लिनुपर्नेजस्ता कारणले रेडक्रसलाई दिएको सो जिम्मेवारी पुनः सरकारले लिने तयारी पनि गरिराखेको छ । “ब्लड बैंक सरकार आफैँले सञ्चालन गर्नुपर्छ भन्ने कुरामा मन्त्रालय सहमतिमा पुगिसकेको छ” कामु सचिव प्रा डा बुर्लाकोटीले भन्नुभयो ।

सोसाइटीका अनुसार ब्लड बैंकमा रगत सङ्कलन तथा वितरणका लागि हाल बर्सेनि सात-आठ करोड रुपैयाँ खर्च भइराखेको छ । रक्त सञ्चार सेवा केन्द्र -ब्लड बैंक)मा गत वर्ष एक लाख ७७ हजार १९५ युनिट रगत सङ्कलन भएको थियो । हाल देशका ६२ जिल्लाका ८५ स्थानमा रक्तसञ्चार सेवा केन्द्र सञ्चालनमा रहेका छन् ।

नेपाल रेडक्रस सोसाइटीका कार्यकारी निर्देशक उमेश ढकालले रक्तसञ्चार सेवा केन्द्र सबै जिल्लामा पुर्‍याउने लक्ष्य रहेको जानकारी दिनुभयो । रासस

समाचार

• अमर लामाको हत्या एमाओवादीले गरेको होइनः प्रचण्ड
• सदरुल हत्या प्रकरणमा छानविन समिति गठन
• बहुमत ल्याउने भन्दै एमाले चुनावी अभियानमा
• काँग्रेस नेपालको ‘नम्बर वान’ पार्टी : थापा
• वार्ता असफल भएपछि राजेन्द्र महतो आमरण अनशनमा