स्वार्थले गर्दा हाम्रो गठबन्धन बनेको हो

राजकिशोर यादव, सूचना तथा सञ्चारमन्त्री

जेलबाट आएको जेपी (जयप्रकाश गुप्ता) जीको पत्र पढें । राजनीतिकरुपमा जेपीजी प्रति मेरो कुनै आग्रह, पूर्वाग्रह छैन । उहाँ पक्राउ परिसकेपछि पार्टीलाई अघि बढाउन जरुरी थियो । तर, केही साथीहरुचाँहि यसलाई तुहाउने र डिस्टर्ब गर्ने काममा लाग्नुभएको छर्लङ्गै छ र यसमा कुनै न कुनै रुपमा जेपीजीको पनि भूमिका र सहयोग देखियो ।

अन्ततोगत्वा हामीले महाधिवेशन गर्‍यौं । बहुतमत साथीहरु यता आउनुभयो । जेपीजीले ढीलै भए पनि यथार्थतालाई स्वीकार गर्नुभयो । हाम्रो पक्षमा निर्वाचन आयोगको निर्णय आइसकेपछि उहाँले ढीलै भए पनि यसलाई समेत स्वीकार्नुभयो । यो उहाँको राम्रो पक्ष हो । उहाँले पहिल्यै यस्तो गर्नुपर्ने थियो । यो विषयमा उहाँले हामीसँग बसेरै छलफल गरेको भए राम्रो हुन्थ्यो । तर, यसबारे मैले उहाँलाई धेरै भन्नु केही छैन, मैले यसलाई सकारात्मक रुपमै लिएको छु ।

मिथ्या आरोप

उहाँले ममाथि जुन आरोपहरु लगाउनुभएको छ, त्यो विल्कुल मिथ्या र निराधार छ । म माओवादीको नजिक र टाढा भएको भन्दा पनि माओवादी र मधेसवादीको यो गठबन्धन उहाँले नै बनाउनुभएको हो । वहाँको अडान के थियो भने हामी मुद्दाको आधारमा माओवादीसँग मिल्नुपर्छ । आफू सत्तामा हुँदा माओवादीलाई मित्र देख्ने तर, आफू कुनै कारणवस सत्ताबाट बाहिरिनुपर्दा हिजो आफूले मित्र मानेको माओवादीले केकति कारणले शत्रु देख्नुभयो ? तर, हामी अहिले पनि मुद्दाकै आधारमा माओवादीसँग सहकार्य गरिरहेका छौं । यसमा पुच्छर वा सिङ भनिराख्न आवश्यक छैन ।

गठबन्धन हाम्रो आवश्यकता

माओवादीसँगको सहकार्य अहिलेको समयको आवश्यकता हो । मधेसी जनतामा संघीयताको प्रवल इच्छा छ । हामी देशलाई गणतन्त्रसहित संघीयताको ढाँचामा लान चाहँदैछौं । यसमा कांग्रेस र एमाले भन्दा माओवादी बढी उदार छ । त्यसैले माओवादीसँग सहकार्य गर्दा हाम्रा मुद्दाहरु सहज ढंगले हल हुन सक्छन् भन्ने हाम्रो बुझाइ छ ।

माओवादीलाई पनि लोकतान्त्रिक विधि र प्रक्रियामा ल्याउनका लागि मोर्चाको साथ चाहिएको छ भने मोर्चालाई पनि अहिलेका परिवर्तनका मुद्दाहरुलाई संस्थागत गर्नका लागि एउटा दरिलो र कसिलो शक्तिको आवश्यकता छ र त्यो माओवादी हो । त्यसैले दुईवटाको स्वार्थले गर्दा हाम्रो गठबन्धन बनेको हो ।

जेपीजीको कुण्ठा

जेपीजीले जे भनिरहनुभएको छ, त्यो वहाँको कुण्ठामात्रै हो । यसमा कुनै सैद्धान्तिक र नीतिगत कुरो छैन । त्यसैले म जेपीजीका बारेमा धेरै बोल्न चाहन्न । म के मात्रै गर्छु भने म कसरी जनताको वीचमा स्थापित हुने ? पार्टीलाई जनताको वीचमा कसरी स्थापित गर्ने ? र, परिवर्तनका मुद्दाहरुलाई कसरी संस्थागत गराउने ? यो कामको प्रक्रियामा अगाडि बढ्दा कति साथीहरु खुशी होलान्, कतिलाई लाभ भएन भने असन्तुष्ट होलान् । यो स्वाभाविक प्रक्रिया हो । तर, हामी माओवादीलाई साथ लिएर जाने आवश्यकता बोध गरिरहेका छौं ।

(कुराकानीमा आधारित)

समाचार

• उपत्यकाको सडकमा अख्तियारले छानविन गर्ने
• वागमतीमा पसे राजेश हमाल ! बाबुरामपछि रेग्मीको पालो
• गुटबन्दीविरुद्ध योजनाबद्ध संघर्ष गर्न एमालेलाई सुझाव
• हवाइ दुर्घटनासँगै वीमासम्बन्धी विवाद बढ्यो
• प्रेसमाथिको आक्रमण सह्य हुँदैनः सञ्चारमन्त्री