शनिबार काठमाडौंमा यसवर्षकै सबैभन्दा चिसो

तापक्रम अझै घट्न सक्छः मौसमविद्

२१ पुस, काठमाडौं । काठमाडौंमा शनिबार यसवर्षकै सबैभन्दा चिसो भएको छ । जल तथा मौसम विज्ञान विभागका अनुसार शनिबार काठमाडौंमा न्यूनतम तापक्रम शुन्य दशमलव ७ डिग्री सेल्सियस मापन गरिएको छ ।

‘आजको तापक्रम यो सिजनकै सबैभन्दा कम तापक्रम हो’ बरिष्ठ मौसमविद् राजेन्द्र श्रेष्ठले अनलाइनखबरसँग भन्नुभयो-’जाडोयाम अझै बाँकी रहेकाले तापक्रम घट्न सक्छ ।’ विहानको समयमा तापक्रम न्युन रहेपनि तराई बाहेकका क्षेत्रमा घाम लागेका कारण दिउँसोको तापक्रम भने घटेको छैन । शनिबार काठमाडौंमा अधिकतम तापक्रम १८ दशमलव २ डिग्री सेल्सियस मापन गरिएको छ ।

‘डिसेम्बरका सुरुका दिनमा पूर्वी पहाडी जिल्लामा पानी परेको थियो । तर, अन्य भागमा जाडोयाममा पानी परेको छैन’ श्रेष्ठले भन्नुभयो-’यसले गर्दा दिउँसोको तापक्रम घटेको छैन ।’ श्रेष्ठका अनुसार आगामी दिनमा तापक्रम अझै घट्न सक्छ । ‘अझै २/३ दिन दिन पानी पर्ने सम्भावना छैन । तर, तापक्रम अझै घट्न सक्छ’ उहाँले भन्नुभयो-’पानी नै पर्दैन भन्ने हैन । पानी पर्ने समय बाँकी नै छ ।’

बरिष्ठ मौसमविद् श्रेष्ठका अनुसार यस वर्षको तापक्रम माइनसमा समेत पुग्न सक्छ । पछिल्लो ५ वर्षदेखि काठमाडौंको तापक्रम माइनसमा झरेको छैन । गत वर्ष न्यूनतम तापक्रम जनवरी १४ मा शुन्य डिग्री सेल्सियस थियो ।

समाचार

• बन्दुकबाट परिवर्तन सम्भव छैन : महरा
• नारायण गोपालको गीत गाउन थाले एमाले नेता
• काम गर्ने मान्छे नभएपछि बुढाबुढी सकी नसकी मेलामा
• अनकन्टार गाउँले बिर्सायो स्वीट्जरल्याण्ड (फोटोफिचर)
• अमर लामाको हत्या एमाओवादीले गरेको होइनः प्रचण्ड