राधाको परिवारमा आएको परिवर्तन

आशा बुढामगर

ओखलढुंगा । अहिले फेदीगुठ गाविस वडा नं. १ मा राधा गुरुङ भनेर नचिन्ने मानिसहरु सायद कमै होलान् । केही वर्ष अगाडिसम्म चामलको भात खान चाडवाड पर्खनु पर्ने, बाह्रै महिना अर्काको ज्याला मजदुरी गर्न जानुपर्ने अवस्था थियो । दुई छोरा र दुई छोरी लाई नयाँ कपडा लगाइदिन र एक छाक मासु खाएको पैसा तिर्न अनि बच्चाहरुको पढाइ खर्च जुटाउन धौधौ थियो राधालाई ।

राधा गुरुङ्ग आफ्नो तरकारी बारीमा

बाँसको टाट्नोले बेरेर बनाएको र खरले छाएको एक तले सानो घर, ४ रोपनी सुख्खा बारी, थोरै वस्तुभाउ थियो सम्पत्तिको नाममा । आफ्नो खेतीको उत्पादनले जम्मा ३ महिना खान पुग्ने अवस्था थियो । आम्दानीको अन्य कुनै श्रोत थिएन । सामान्य आफ्नो नाम सम्म लेख्न सक्ने उहाँको सामाजिक रुपमा कुनै पहिचान तथा हैसियत थिएन ।

श्रीमान मेख गुरुङ्गलाई पनि रोजगारी मिल्यो तरकारी खेतीबाट

गाउँमा रोजगारीको अबस्था नभएपछि रोजगारीको शिलशिलामा कहिले भारत तिर त कहिले घुर्मी, उदयपुर कटारी, धरानतिर पनि पैसा कमाउनु जानुभयो उहाँका श्रीमान् मेखबहादुर । खासै केही उपलब्धि हुन सकेन तर घुम्ने क्रममा बजारका लागि तरकारीको माग बढ्दै गए पनि आपुर्तीमा कमी भएको थाहा पाउनुभयो ।

सन् २००९ देखि दिगो भू व्यबस्थापन कार्यक्रम फेदीगुठमा लागू भएपछि उहाँलाई ढुंगा खोज्दा देउता मिले झै भयो । कार्यक्रमले विभिन्न किसिमका विउहरु दिँदै खेती र हेरचाह गर्न सिकायो । । उहाँले अनुभवी अगुवा कृषक तालिम पनि लिनुभयो । तर सिंचाईको अभावमा दुःखअनुसार तरकारीबाट खासै केही फाइदा भएन ।

जीवनस्तर सुधारका लागि स्थानीय पूर्वाधार कार्यक्रम -लिली) बाट पोखरी सिंचाई योजना निर्माण भएपछि अहिले फेदिगुठ १ का किसानलगायत राधा गुरुङ्गको पनि जीवनस्तरमा धेरै परिवर्तन आएको छ । पोखरीको निर्माण कार्यमा उहाँ र श्रीमानले ज्यालादारी गरेर जम्मा २४ हजार ५ सय ४० आम्दानी गर्नुभयो । उक्त रकमबाट उहाँले खाद्यान्नसाथै तरकारीको बीउ किनेर ब्याबसायिक तरकारी खेती शुरु गर्नुभयो ।

सिंचाईको सुबिधा भएपछि मौसमी बेमौसमी तरकारी खेती, र नर्सरी सञ्चालन गर्दै अहिले उहाँ वाषिर्क ७० /८० हजार आम्दानी गर्नुहुन्छ । उहाँले यसपटक आफ्नो लगानीमा थप प्लाष्टिक टनेल खरिद गरी गोलभेडा खेती गरिरहनुभएको छ । राधाले बच्चाहरुलाई राम्रै शिक्षा दिक्षा र सानो एक तले घर पनि बनाइक्नुभएको छ । उहाँको सामाजिक हैसियतमा पनि परिवर्तन आएको छ, गाउँमा सम्मान बढेको छ । उहाँबाट धेरै कृषकले कृषि परामर्श लिने गरेका छन् । उहाँको सिको गरेर अहिले गाउँमा अन्य कृषकहरुले पनि व्यवसायिक तरकारी खेती शुरु गरेका छन् । अहिले फेदिगुठका व्यवसायिक कृषकहरुमा राधा गुरुङ्ग, नैनकला गुरुङ्ग, दुर्गा गुरुङ्ग आदि पर्नुहुन्छ । उहाँहरुले आफ्नो उत्पादन गाउँलगायत फलाँटे भञ्ज्याङ्ग र कोषाट सम्म पुर्‍याएर बिक्री गर्नुहुन्छ ।

राधा भन्नुहुन्छ- ‘मेरा श्रीमान्ले पैसा कमाउन धेरै ठाँऊ चाहार्नुभयो । पैसा त्यसै नफल्ने, जागिर खान पढेको छैन, कसले जागिर दिने ? तर, मैले अनुभवी अगुवा कृषकको तालिम पाएपछि हरेक कुरा आफै गर्न सक्ने भएको छु । श्रीमान्ले मद्दत गर्नुहुन्छ, कृषिमै ब्यस्तता बढेको छ, रोजगारी भएको छ । अर्काको काम गर्नँ परेको छैन । बर्षभरि आफ्नै आम्दानीले खान पुगेको छ । बच्चालाई कसरी पढाऊँ, के खुवाउँ भनेर चिन्ता गर्नु परेको छैन । पैसा कमाउन बिदेशमा नै जानुपर्छ भन्ने हाम्रा गाँऊका युवाहरुले एकपटक राम्ररी सोचे त हुने हो । मेहेनत गरे गाऊँमै नै प्रशस्त पैसा फल्दो रहेछ ।’

English Headline News

समाचार

• संविधानसभा अध्यादेशमा ‘अन्य जाति’ अझै यथावत
• कम्मल बोकेर दार्चुला पुगेका कर्मचारीसँग बाढीपीडित आक्रोशित
• सडक विस्तारलाई तीव्रता दिन अध्यक्ष रेग्मीको निर्देशन
• विमा समितिका कार्यकारी निर्देशकलाई नहटाउन सर्वोच्चको आदेश
• बाढी पीडितको उद्धारमा कन्जुस्याँई नगर्न रेग्मीको निर्देशन