सुन अभावले व्यवसायी मर्कामा

भारतका कारण नेपाली सुन व्यवसाय प्रभावित

१० माघ, काठमाडौं । माघ लागेपछि व्यापार बढ्ने आशमा रहेका सुन व्यवसायी अहिले चिन्तित छन् । विवाहको मौसम हुँदासमेत कारोबार उत्साहजनक नरहेको नेपाल सुनचाँदी व्यवसायी संघले जनाएको छ । ‘माग अनुसार पुर्याउन नसक्दा कारोबार उत्साहजनक छैन’ संघका अध्यक्ष तेजरत्न शाक्यले अनलाइनखबरलाई बताउनुभयो ।

शाक्यका अनुसार माघ लाग्नेबित्तिकै सुनको माग पनि बढेको छ । ‘सिजनको बेला भएकाले माग दैनिक ३५ किलो हाराहारीमा छ’ उहाँले भन्नुभयो-’तर बैंकले १५ किलो मात्र उपलव्ध गराउने भएकाले हामीले माग भए पनि बेच्न पाएका छैनौं ।’

भारतको सोझो असर

भारतले सुनको भन्सार बढाएपछि नेपाली बजारमा यसको सोझो असर परेको छ । ‘बैंकले थोरै दिँदा एकातिर समस्या छँदैथियो । अर्कोतिर भारतले भन्सार बढाउँदा समेत अभाव थपिएको छ’ शाक्यले भन्नुभयो । भन्सार बृद्धिपछि भारतीय बजारमा सुनको भाउ बढेको छ । यसको असर नेपाली बजारमा परेको हो । यसबाट चीन हुँदै नेपाल भएर अवैध रुपमा निर्यात हुने सुनको माग पनि बढ्ने व्यवसायीहरु बताउँछन् ।

मूल्य स्थिर

तीन दिनदेखि सुनको भाउ स्थिर छ । सोमबार, मंगलबार र बुधबार सुन तोलाको ५८ हजार ६ सय रुपैंयामा कारोबार भएको संघले जनाएको छ । चाँदीको मूल्य भने थपघट भैरहेको छ । बुधबार चाँदी अघिल्लो दिनको तुलनामा ५ रुपैंया बढेर तोलाको १ हजार १ सय ४० रुपैंया पुगेको छ ।

समाचार

• पर्शुराम र गणेश लामालाई एमाले र फोरमको संरक्षण जारी
• लोकमानलाई अख्तियार प्रमुख मान्दैनौः ज्ञवाली
• काम गर्ने मान्छे नभएपछि बुढाबुढी सकी नसकी मेलामा
• बीच सडकमा भेटेको बच्चा देउता जस्तो : ट्रकचालक
• आदिवासी जनजातिलाई थ्रेसहोल्ड अस्वीकार्य