स्थापितलाई हटाउने निर्णय कार्यान्वयन नगर्न सर्वोच्चको आदेश

स्थापितलाई मैले ल्याएको हो, हटाएको हैन : हिसिला

१२ माघ काठमाडौं । प्रधानमन्त्री पत्नी हिसिला यमी र काठमाडौं उपत्यका विकास प्राधीकरणमा सर्वोच्च अदालतको अन्तरिम आदेशद्वारा आजै पुनःस्थापित आयुक्त केशव स्थापितवीच यतिबेला सम्बन्ध चिसिएको छ । विगतमा राम्रो रहेको उहाँहरुको सम्बन्धमात्रै चिसिएको छैन, स्थापितले प्राधीकरणबाट विस्थापित हुनासाथ हिसिला र उनकी सहयोगीले आफूसँग पैसाको बार्गेनिङ गरेको सार्वजनिक आरोप नै लगाइसक्नुभएको छ ।

प्राधिकरणको आयुक्तमा नियुक्त भएको ९ महिनामै सरकारले हटाएपछि स्थापित हिसिला यमीसँग रिसाउनुभएको हो । यद्यपि सर्वोच्चले स्थापितलाई तत्काल नहटाउन शुक्रबार अन्तरिम आदेश दिएको छ । सरकारले स्थापितलाई हटाएर गत माघ ४ गते योगेश्वरकृष्ण पराजुलीलाई प्राधीकरणको आयुक्त बनाएको थियो ।

प्राधीकरणबाट हटाइएपछि पुर्नबहालीका लागि सर्वोच्च अदालतमा रिट दायर गरेका स्थापितको गुनासो छ, ‘प्रधानमन्त्रीसित त मेरो राम्रो थियो, उहाँले कुनै काममा दबाब दिनुभएन तर, उहाँका आसेपासे र नजिकका मान्छेले पनि हैरान गरे ।’ हिसिलातर्फ संकेत गर्दै स्थापित भन्नुन्छ- ‘कहिले यसलाई त कहिले उसलाई नियुक्ति गर् भनेर बारम्बार दबाब दिएर हैरान गर्नुभयो ।’

आफूलाई बिनाकारण सरकारले हटाएको भन्दै स्थापित असन्तुष्ट हुनुहुन्छ । ‘प्रधानमन्त्रीज्यूले निकै कर गरेर मात्रै जिम्मेवारी लिएको हुँ, मलाई अहिले स्पष्टीकरण दिने मौका समेत दिइएन ।’ राजधानीको विकास निर्माणका लागि आफूले दर्जनौं योजना बनाए पनि मन्त्रिपरिषद्ले स्वीकृत नगरेको उहाँले गुनासो गर्नुभयो । ‘मैले कति योजना बनाएँ, पठाएँ, वास्तै गरिएन’ स्थापितले भन्नुभयो-’किन भएन भनेर बल्ल म अब खोज्दैछु ।’

काम नगरी श्रीमतीसँग फिनल्याण्ड घुमेको आरोप

एमाओवादी नेतृसमेत रहनुभएकी प्रमपत्नी हिसिला यमीले स्थापितसँग पैसा मागेको भन्ने आरोपलाई ‘पूर्ण झुठ’ बताउनुभयो । ‘स्थापितलाई प्राधीकरणमा ल्याउनमा चाँहि मेरो भूमिका थियो, तर कसरी र के कारणले हटे, थाहा छैन । मैले लगाएको गुन उनले यसैगरी तिर्दैछन्, यसका लागि म उनलाई धन्यवाद दिन चाहन्छु ।’ अनलाइनखबरसँग कुरा गर्दै यमीले भन्नुभयो-’मेरो विचारमा कुरामात्रै ठूलो गर्ने तर, केही पनि काम नगरेका कारण उनलाई सरकारले हटाएको हुनसक्छ ।’

स्थापितले प्राधीकरणमा कुनै योजना नल्याएको र गफमात्रै गरेको भन्दै यमीले अनलाइनखबरसँग भन्नुभयो- ‘उनी प्राधीकरणमा गएका बेला श्रीमती लिएर फिनल्याण्ड डुल्न गए, तर, कामचाँहि एउटै गरेनन् । फिनल्याण्ड अरुलाई नै लाने कुरा थियो, तर श्रीमतीलाई पो लिएर गएछन् ।’

काठमाडौंका पूर्व मेयरसमेत रहनुभएका स्थापितले आफ्नो छोरो फिनल्याण्डमा पढिरहेको शुक्रबार एक दैनिकलाई दिएको अन्तरवार्तामा खुलासा गर्नुभएको छ । तर, छोरो भेट्ने निहुँमा श्रीमान-श्रीमती नै फिनल्याण्ड गए पनि राज्यकोषकै पैसाबाट स्थापित दम्पत्तिले सो भ्रमण गरेको स्रोतको आरोप छ ।

सर्वोच्चले भन्योः निर्णय कार्यान्वयन नगर्नु

न्यायाधीश गिरिशचन्द्र लालको एकल इजालशले स्थापितलार्इ हटाउने निर्णय माघ २२ गतेसम्मका कार्यन्वयन नगर्न नगारउन आदेश दिएको छ ।

आदेशमा दुवै पक्षलाई छलफलका लागि २२ माघमा बोलाइएको छ भने विपक्षीका नाममा कारण देखाउ आदेश पनि जारी गरिएको सर्वोच्च अदालतका सहप्रवक्ता हेमन्त रावलले जानकारी दिनुभयो । आफूलाई कानून विपरित उपत्यका विकास प्राधिकरणको प्रमुख आयुक्तबाट हटाइएको भन्दै स्थापितले ८ माघमा सर्वोच्च अदालतमा रिट दायर गर्नु भएको थियो । ४ माघमा बसेको मन्त्रिपरिषदको बैठकले स्थापितलाई हटाई उनको ठाउँमा योगेश्वरकृष्ण पराजुलीलाई नियुक्त गरेको थियो ।

समाचार

• गुटबन्दीविरुद्ध योजनाबद्ध संघर्ष गर्न एमालेलाई सुझाव
• प्रेसमाथिको आक्रमण सह्य हुँदैनः सञ्चारमन्त्री
• मलाई भारतीय दूत भन्नेहरु पागल हुन् : अमरेश सिंह
• वर्तमान सरकारले चुनाव गराउन सक्दैन : बादल
• संविधानसभाको निर्वाचन मंसिरमै हुन्छ : सिटौला