ठूलाबडालाई हृदयघातको सम्भावना बढी

खानपान र जीवनशैली परिवर्तन मुख्य कारण

१० फागुन, काठमाडौं । पूर्वयुवराज पारस शाह यतिबेला थाइल्याण्डमा हृदयघातको सामना गरिरहनुभएको छ । आखिर मानिसलाई किन हुन्छ हृदयघात ? हृदयरोग विशेषज्ञहरुका अनुसार नेपालमा मात्रै होइन, विश्वका धेरै शासक, नेता, उद्योगी, व्यवसायी एवं उच्च पदस्थ व्यक्तिलाई हृदयघात हुने गरेको छ । हृदयघातकै कारण धेरैको ज्यान जाने गरेको छ भने कतिपय पक्षघात लगायतका गम्भीर बिरामी हुने गरेका छन् । खानपान र जीवनशैलीमा आएको परिवर्तनले हृदयघातका बिरामी र यसको जोखिम बढ्दै गएको गंगालाल हृदयरोग केन्दमा कार्यरत डा. साजन वैद्यले अनलाइनखबरसँग भन्नुभयो ।

ठूलाबडालाई नै किन ?

ग्यास्टिकलाई गरीबको रोग भनिन्छ । ग्यास्टिकले हैरान बनाउने गरीबलाई हृदयघातले चाहिँ त्यतिधेरै छुँदैन । ‘बढी आराम गर्ने र आधुनिक जीवनशैली अपनाउनेलाई हृदयघात हुने गरेको छ’-डा. बैद्यले भन्नुभयो । उहाँका अनुसार हिँड्नुको सट्टा धेरै सवारीसाधन चढ्ने, मोजमस्तीमा रमाउने र जथाभावी खानपिन गर्नेलाई बढी हृदयघात हुने गरेको छ ।

व्यायामको कमी र बढी चिल्लो, पिरो एवं मसलेदार खाना खानेलाई हृदयघातको सम्भावना बढी हुने बैद्य बताउनु हुन्छ । आधुनिक जीवनशैली र जथाभावी खानपीनले प्रेसर, सुगर र कोलस्ट्रोल बढाउने र यसकै कारण हृदयघात हुने डा. वैद्यको तर्क छ । उहाँ भन्नुहुन्छ-’मधुमेहले हृदयघात हुने सम्भावना झन् बढी हुन्छ ।’ चुरोट बढी सेवन गर्नेलाई पनि हृदयघातको खतरा बढी हुन्छ । ‘अहिलेका युवाहरु धूमपानजस्तो कुलतमा लागेका कारण उनीहरुमा हृदयघात हुने खतरा बढी छ’ बैद्यले भन्नुभयो ।

यस्तै निद्रा लाग्ने औषधिको धेरै सेवन गरेमा, मादक पदार्थ धेरै लिएमा र विषालु ग्यासको नजिक भएमा पनि हृदयघात हुन सक्ने विशेषज्ञ बताउँछन् ।

बढ्दो हृदयघात

हृदयघातले मुटु सञ्चालनमा अवरोध पुर्याउँछ । शरीरमा राम्ररी रक्तसञ्चार नभएमा दिमागमा अक्सिजन पुग्न सक्दैन र मान्छे बेहोस हुन्छ । जसले श्वासप्रश्वास नै रोकिदिन्छ । हृदयघातले रक्तसञ्चार रोक्ने र त्यसले श्वासप्रश्वासमा नै असर पुर्याउने भएकाले समयमै उपचार गर्न नसकेमा बिरामीको उतिखेरै मृत्यु हुन्छ ।

नेपालमा मुटु रोगी ४५ लाख

मुटुसम्बन्धी समस्यामध्ये हृदयरोग जटिल समस्या हो । नेपालका ४५ लाख मानिसलाई कुनै न कुनै प्रकारको मुटुरोग भएको अनुमान गरिएको छ । विशेषज्ञहरुका अनुसार १० वर्षयता नेपालमा मुटुरोगीहरुको संख्या ५ गुणाले बढेको छ । मुटरोग विशेषज्ञ डा. बद्री पौडेलका अनुसार १८ वर्ष उमेरमाथिका झण्डै २० प्रतिशतलाई उच्च रक्तचाप, ३ प्रतिशतलाई मुटुको कोरोनरी रोग र १० प्रतिशतलाई मधुमेह छ । यस्तै स्कूल जाने उमेरका १ प्रतिशतभन्दा बढीलाई बाथ, मुटुको रोग र त्यति नै अनुपातमा जन्मजात मुटुको रोग छ ।

हृदयघातबाट कसरी बच्ने ?

नेपालमा हृदयघातको समस्या बढ्दै गएकाले सतर्क रहन विशेषज्ञले अपील गरेका छन् । जीवनशैली र खानपानमा सुधार गर्ने हो भने हृदयघातबाट बच्न सकिन्छ । डा. बद्री पौडेलको सल्लाह यस्तो छ :

· चुरोट, सूर्ती सेवा नगर्ने या त्याग्ने ।

· नियमित शारिरीक व्यायाम गर्ने ।

· सागसब्जी र फलफूल बढी सेवन गर्ने ।

· मासु, चिल्लो, बोसोयुक्त खानेकुरा र जंकफुड कम गर्ने ।

· मानसिक तनाव कम गर्ने ।

· तौल ठीक राख्ने, भुँडी बढ्न नदिने ।

· नियमित रुपमा चिकित्सकसँग सम्पर्कमा रहेर परीक्षण गर्ने ।

नाम (अनिवार्य)

इमेल (अनिवार्य) (गोप्य राखिनेछ)

वेबसाइट

प्रतिक्रिया

रद्द गर्नुहोस्

समाचार

• उपत्यकाको सडकमा अख्तियारले छानविन गर्ने
• वागमतीमा पसे राजेश हमाल ! बाबुरामपछि रेग्मीको पालो
• गुटबन्दीविरुद्ध योजनाबद्ध संघर्ष गर्न एमालेलाई सुझाव
• हवाइ दुर्घटनासँगै वीमासम्बन्धी विवाद बढ्यो
• प्रेसमाथिको आक्रमण सह्य हुँदैनः सञ्चारमन्त्री