एमालेको युवा संघमा ‘बूढा’हरुको बाहुल्य

११ फागुन, काठमाडौं । ६० वर्ष कटेका वृद्ध नेताहरुले समेत आफूलाई युवा नेता भन्ने देशमा त्यसभन्दा कम उमेरका नेताले त्यस्तो ठान्नु स्वभाविक नै होला । तर आफूले नै बनाएको नीति उल्लंघन हुनेगरी नेतृत्व लिन खोज्ने प्रवृत्तिचाहिँ अचम्मको छ ।सन्दर्भ हो, नेकपा एमालेको भ्रातृ संगठन युवा संघ नेपालको । एकीकृत नेकपा माओवादीको वाईसीएलले देशभरि जगजगी फैलायो भनेर त्यसलाई ‘काउन्टर’ गर्न सक्रिय एमालेको युवा संघ यतिखेर नयाँ नेतृत्व चयनमा लागेको छ । बुटवलमा शुरु भएको महाधिवेशनले आगामी ३ वर्षका लागि नयाँ नेतृत्व चयन गर्नेछ ।

युवा संघमा अलि बढी ‘लडाकु’ भनेर चिनिएका वर्तमान अध्यक्ष महेश बस्नेत फेरि पनि अध्यक्ष बन्न जोशिनुभएको छ । पार्टी नेता केपी ओलीको दाहिने हातका रुपमा रहेका बस्नेतलाई लडाकु स्वभाव भएका कार्यकर्ताले साथ दिएका छन् । तर, अब मारमुङ्ग्री र पाखुरी बलभन्दा सृजनात्मक काम गर्नुपर्ने भएकाले बस्नेतको ठाउँमा नयाँ अनुहार हुनुपर्ने आवाज बलियो रुपमा उठेको छ ।वर्तमान उपाध्यक्ष झपट रावल र हिरा केसी तथा महासचिव निरज आचार्यले पनि अध्यक्षमा उम्मेद्वारी दिने तयारी गरेका छन् । रावललाई बरिष्ठ नेता माधवकुमार नेपाल र आचार्यलाई अध्यक्ष झलनाथ खनालको साथ रहेकाले यी दुईको चर्चा बढी छ । बस्नेतपछि दोस्रो नम्बरमा रहेकाले रावलको सम्भावना बढी देखिएपनि बस्नेतले हतपती छोड्न नमान्ने भएकाले अहिल्यै केही भन्न नमिल्ने एमाले नेताहरु बताउँछन् ।

नेतृत्व लिन खोज्ने सबै ४० आसपासका

संयुक्त राष्ट्रसंघले १५ देखि २४ वर्ष उमेर समूहलाई युवा मानेपनि नेपालको राष्ट्रिय युवा नीतिले १६ देखि ४० वर्ष सम्मलाई युवा मानेको छ । युवाको परिभाषामा उमेरहद ३५ वर्षको हुनुपर्ने धेरैको जोड रहे पनि नीति बनाउनेहरु ४० आसपासका भएकाले नीतिमा ५ वर्ष बढाएर ४० वर्ष उल्लेख भएको हो ।राष्ट्रिय नीतिकै व्यवस्थाअनुसार युवा संघले पनि आफ्नो नियमावलीमा नेतृत्वका लागि ४० वर्ष उमेर हद तोकेको छ । अहिले नेतृत्वमा रहेका बस्नेतलगायतका नेताहरु ४० काटिसकेका देखिए पनि उनीहरुले आफूलाई ३५/३६ नै भन्ने गरेका छन् । उनीहरुको फेसबुक पेजमा राखिएको जन्ममिति पनि यस्तै छ ।

बस्नेतले आफ्नो फेसबुक पेजमा राखेको जन्ममिति सन् १९७४ हो । यसलाई आधार मान्ने हो भने भने उहाँ अहिले ३९ वर्षको हुनुभयो । युवा संघको कार्यकाल ३ वर्षको हुन्छ । अहिले उहाँ अध्यक्ष बन्नुभएमा युवासंघकै नियमअनुसार अर्को वर्षदेखि उहाँको उमेर हदले नै नेतृत्वमा रहन दिँदैन । अध्यक्ष बस्नेतलाई सन् १९७४ मा जन्मिएको पत्याउने हो भने उनको जन्म विसं ०३१ सालमा भएको मान्नुपर्ने हुन्छ । यो हिसाबले ०५४ मा उनी गाविस अध्यक्ष हुँदा २३ वर्ष मात्रै रहेको निश्कर्ष निस्कन्छ । जबकि उमेद्वारका लागि २५ वर्षको हुनुपर्ने कानूनी प्रावधान छ । यसले पनि प्रष्ट गर्छ, नेताहरुले फेसबुकमा राखेको उमेर सही छैन ।

रावलले आफ्नो फेसबुक पेजमा राखेको जन्ममिति सन् १९७५ हो । यस हिसाबले अहिले उहाँ ३८ वर्ष हुनुभयो । दुई वर्षपछि उहाँ पनि अयोग्य हुनुहुनेछ । आचार्यले चाहिं आफ्नो जन्ममिति १९७७ र केसीले १९७६ राख्नुभएको छ । तर, धेरैले आफ्नो फेसबुक पेजमा सही जन्म साल राख्दैनन् । आफ्नो उमेर कम बनाएर राख्ने चलन छ । त्यसमाथि नेतृत्व हडप्न बस्नेतलगायतका नेताहरुले नक्कली उमेर बनाएको आरोप पनि संघभित्रै लागेको छ । ’उमेरले नदिने भएपछि केहीले नागरिकतासमेत सच्याएको सुनिएको छ’ एमालेका एक युवा नेताले अनलाइनखबरसित भने-’तर यस्तो प्रवृत्ति अन्त्य गर्न हामी लागेका छौं ।’

बन्द सत्र शनिवारवाट 

नेकपा एमालेको भ्रातृसंगठन युवा संघ नेपालको आठौं राष्ट्रिय महाधिवेशन आजदेखि बुटवलमा शुरु भएको छ ।  आगामी ३ वर्षे कार्यकालको नेतृत्व चयनका लागि हुने महाधिवेशनमा देशभरबाट पाँच सय महिलासहित एक हजार पाँच सय प्रतिनिधि बन्दसत्रमा सहभागी हुनेछन् । उद्घाटन समारोहमा एक लाख जनता उतार्ने लक्ष्य राखिएको महाधिवेशन आयोजक मुल समिति संयोजक झपट रावलले जानकारी दिनुभयो । १३५ सदस्यीय केन्द्रीय समितिको नेतृत्व चयनका लागि बन्दसत्र भोलिदेखि शुरु हुनेछ ।

समाचार

• निर्वाचन घोषणा गर्न सरकार आतुरः रेग्मी
• मंसिरमा निर्वाचन नभए सरकारको अस्तित्व सकिन्छः एमाओवादी प्रवक्ता
• कीर्तिमानी आरोही गौतम भन्छन्-सगरमाथा कालो पहाडजस्तो देखें
• नागदह नियाल्दा (फोटोफिचर)
• तालिबानी आक्रमणमा काबुलमा नेपाली मारिए