चार दलले सरकार बनाउन सर्वोच्चको फैसला नकुर्ने

नेता भन्छन्-अदालतले आफ्नो काम गर्छ, हामी आफ्नो गर्छौं

२४ फागुन, काठमाडौं । प्रमुख चार दलले प्रधानन्यायाधीश खिलराज रेग्मीको नेतृत्वमा चुनावी सरकार बनाउन सर्वोच्च अदालतको फैसला नकुर्ने भएका छन् । रेग्मीलाई रोक्न माग गर्दै परेको रिटमा सर्वोच्चले बिहीबार सुनाउने भनेको फैसला चैत १ लाई सारेपछि बसेको शीर्ष नेताहरुको बैठकले अदालतको फैसला नकुर्ने र तत्काल सहमति गरेर सरकार बनाउने निर्णय गरेको हो ।

एमाओवादी नेता खिमलाल देवकोटाले अनलाइनखबरसँग भन्नुभयो-’अदालतले आफ्नौ फैसला गर्दै गर्छ, यसले राजनीतिक सहमतिमा केही असर गर्दैन ।’ यस्तै कांग्रेस नेता डा. रामशरण महतले पनि सरकार गठनका लागि दलहरुबीच सहमति गर्न अदालतले नरोक्ने बताउनुभयो । ‘सरकार बनाउने राजनीतिक सहमति हो’ महतले भन्नुभयो-’सर्वोच्चले आफ्नो फैसला सुनाउँछ । त्यसपछि हामी त्यसलाई मानेर अगाडि जान्छौं । तर, राजनीतिक सहमतिमा सरकार बनाउन त्यसले रोक्दैन ।’ 

श्रोतका अनुसार सर्वोच्चले प्रक्रिया रोक्न अन्तरिम आदेश नदिएकाले सकारात्मक फैसला आउनेमा दलका नेताहरु विश्वस्त देखिएका हुन् । सर्वोच्चले दलीय सहमति प्रतिकूल फैसला सुनाए रेग्मीलाई राजीनामा गराएर अघि बढ्न सकिने नेताहरुको बुझाइ छ ।

दलका नेताहरुले अदालतको फैसलालाई नपर्खीर् अघि बढ्ने बताए पनि नेपाल बार एसोसिएसनका उपाध्यक्ष टीकाराम भट्टराई भने अदालतको फैसलाअघि रेग्मीको नेतृत्वमा सरकार बन्न नसक्ने दाबी गर्नुभयो । भट्टराईले अनलाइनखबरसँग भन्नुभयो -’प्रधानन्यायाधीशले जारी गर्नुभएको प्रेस विज्ञप्तिमा न्यायालयलाई उच्च सम्मान गर्ने बताउनुभएको छ । राष्ट्रपतिले पनि संविधानबाहिर नजाने बताउनुभएकाले चैत्र १ अगावै यो प्रक्रियाले गति लिने अवस्था छैन ।’

फेरि कार्यदललाई जिम्मा

शीर्ष नेताहरुले सत्यनिरुपण तथा मेलमिलाप आयोग गठनबारे सहमति गर्ने जिम्मा कार्यदललाई दिएको छ । ‘सत्य निपरुपणबारे अहिलेसम्म भएका छलफलका आधारमा सरकारले तयार पारेको मस्यौदालाई अध्यनन गरेर सहमति गर्ने जिम्मा कार्यदललाई दिएको छ’ बैठकपछि एमाले नेता भीम रावलले भन्नुभयो । एमाओवादी नेता देवकोटाले कार्यदलले छलफल गरी राष्ट्रपतिसमक्ष सरकारले पठाएको अध्यादेशमा नै सहमति जुट्ने दावी गर्नुभयो ।

अध्यादेशमा द्वन्द्वकालका घटनाको छानविन गर्ने र आममाफी दिने प्रस्ताव छ । कांग्रेस केही घटनामा आममाफी दिन नहुने पक्षमा छ भने एमाले कांगेस भन्दा पनि कडा छ । ‘यसमा कांग्रेस केही नरम रुपमा प्रस्तुत भएको छ’ स्रोतले भन्यो-’तर एमालेले मानेको छैन ।’

चार दलबीच समायोजनमा गएका लडाकूको दर्जा निर्धारणमा पनि सहमति जुट्न सकेको छैन । एमाओवादीले जेन्टलमेन्ट एगि्रमेन्ट भएको भन्दै एक कर्नेल र दुई लेफि्टनेन कर्नेल दावी गरेपनि कांग्रेस र एमाले मेजर भन्दा माथिल्लो दर्जा दिन नसक्ने अडानमा छन् । ‘लडाकूहरुको दर्जाका विषयमा सहमति हुन सकेको छैन’ एमाले नेता रावलले भन्नुभयो-’यसबारे शीर्ष नेताहरुबीच भोलि छलफल हुन्छ ।’

नेताहरुका अनुसार कार्यदलको बैठक विहान ८ बजे बस्नेछ । कार्यदलले २ घण्टामा आफ्नो जिम्मेबारी पूरा गर्ने र ११ बजे शीर्ष बस्ने बस्ने कार्यक्रम छ ।

समाचार

• बैशाख महिनामा २२७ वटा महिला हिंसाका घटना
• नहारेका ‘राजावादी’ भन्छन्- म त कवाडी भैहालें
• गृहमन्त्रीको आश्वासनपछि पूर्वसभासद् हकको अन्त्येष्टि गर्न परिवार सहमत
• महतोको अनशनमा प्रहरी हस्तक्षेप, अस्पताल भर्ना
• रेग्मीको विरोधमा पापडको र्‍याली