रेग्मीमा आज सहमति नभए नयाँ ‘कोर्स’ : एमाओवादी

देलान् त प्रचण्डले अदालतलाई चक्मा ?

३० फागुन, काठमाडौं । प्रधानन्यायाधीश खिलराज रेग्मीलाई चुनावी सरकारको नेतृत्व सुम्पने प्रक्रिया आज टुंगोमा नपुगे एमाओवादीले एक महिनाबाट लम्बिएको यो प्रकरणसम्बन्धी कोर्स -अध्याय) को अन्त्य भएको घोषणा गर्ने भित्री तयारी गरेको छ ।

‘यही कोर्षमा कतिञ्जेल अल्मलिने ? दिनहुँ वार्तामा बस्दाबस्दै हाम्रो पार्टीको बैठकसमेत रोकिएको छ । त्यसैले आज सहमति भएन भने यो कोर्षलाई अन्त्य गरी पर्सिबाट नयाँ कोर्समा जाने तयारीमा अध्यक्ष प्रचण्ड हुनुहुन्छ ।’ एमाओवादी नेताले भने- ‘त्यो नयाँ कोर्स भनेको बाबुराम सरकारकै निरन्तरता हुनसक्छ ।’

तर, आज दलहरुवीच कुरा मिल्यो भने जेठमा चुनाव गर्न सकिने उनले बताए । ‘आज प्रधानन्यायाधीश रेग्मीको नेतृत्वमा चुनाबी सरकार गठन भए, जेठमा चुनाव गर्न सकिन्छ ।’ उनले भने, ‘निर्वाचन आयोगले सम्पूर्ण तयारी गरिरहेकै छ, जेठमा चुनावमा जाने सहमति भयो भने सहजै चुनावमा जान सकिन्छ ।’

मंसिरमा भन्दा जेठमा चुनाव गर्न सके आफ्नो दललाई फाइदा हुने एमाओवादी विश्लेषण छ । रेग्मी सरकार मंसिरसम्म तन्कियो भने मन्त्रीहरु विभिन्न विवादमा पर्न थाल्ने र जनतामा निराशा छाउने एमाओवादी नेताले अनलाइनखबरलाई बताए ।

भोलिदेखि अदालतमा सुनुवाइ

आज रेग्मी प्रकरणबारे अन्तिम टुंगो लगाउन दलहरु लागि परेका छन् भने आज यो प्रकरण टुंगिए पनि वा नटुंगिए पनि सर्वोच्च अदालतले भोलिबाट रेग्मीसम्बन्धी बहुप्रतिक्षित मुद्दामा सुनुवाइ गर्दैछ । अधिवक्ता भरतमणि जंगम र ओमप्रकाश अर्यालले हालेको मुद्दामाथि हुने सुनुवाइ केही दिन लम्बिने अनुमान कानुनविद्हरुले गरेका छन् ।

रेग्मीलाई प्रधानमन्त्री बनाउन नमिल्ने मुद्दामाथिको सुनुवाइ भोलिबाट हुने भए पनि चन्द्रकान्त ज्ञवालीको अर्को मुद्दामा चैत्र २ गते सुनवाइ तोकिएको छ । ज्ञवालीले बाधा अड्काऊ फुकाएर संविधान संशोन गर्न नमिल्ने दाबी गर्दै हालेको मुद्दाको दरपीठ बदर भई २ गतेलाई सुनुवाइ तोकिएको हो । अधिवक्ता हरिशंकर कर्णले दायर गरेको बाधा अड्काऊ रोक्ने चौथो मुद्दामा भने लिखित जवाफ मागिसके पनि अदालतले सुनवाइको मिति तोकेको छैन ।

देलान् त प्रचण्डले अदालतलाई चक्मा ?

अदालतले रेग्मी प्रकरणमा सुनुवाइ थाल्नु अगावै रेग्मीलाई प्रधानमन्त्री बनाउन तम्सिएका नेताहरुका लागि आज एक दिनको मात्रै समय छ । रेग्मीलाई प्रधानमन्त्री बन्न नदिन हात धोएर लाग्नेहरुका लागि पनि वातावरण बिगार्नका लागि एक दिनको मात्रै समय छ । आज सहमति भएन भने बिहीबार एकातिर अदालतमा सुनुवाइ र अर्कातिर नेताहरुको बैठक बस्नुपर्ने हुन सक्छ ।

एमाओवादी नेताले दाबी गरेजस्तै आजै सहमति नभए चक्मा दिन माहिर एमाओवादी अध्यक्ष प्रचण्डले यो कोर्ष यहीँ अन्त्य भएको घोषणा गरे भने के होला ? न रहे बाँस, न बजे बाँसुरी भनेजस्तै अदालतमा यसबारे बहस गुर्न नै बेकार ठहरिन सक्छ । तर, त्यसपछिको बाटो के भन्नेबारे चाँहि मुलुक थप अन्यौलमा पर्न सक्छ । त्यसपछि या त सुजाता कोइरालाले भनेजसरी बाबुराम नेतृत्वकै सरकारमा कांग्रेस, एमाले सहभागी भएर चुनावमा जानुपर्ने हुन्छ, या आन्दोलनबाटै सरकार ढाल्ने पुरानो कार्यक्रममा विपक्षीहरुले फर्कनुपर्ने हुन सक्छ । यसर्थ, कांग्रेस र एमाले नेताहरु पनि आजै सहमति गर्न र उनीहरुकै शब्दमा ‘बाबुराम सरकारको सर्वसत्तावाद’ अन्त्य गर्न चर्को दबावमा छन् ।

समाचार

• सुनको मूल्य ९३ रुपैयाँ बढ्यो, चाँदी स्थिर
• फर्जी भर्नाको विरोधमा विद्यार्थी नेता अनशनमा
• संविधानसभा अगाडि गाई बहुलायो (भिडियोसहित)
• दार्चुलामा बस दुर्घटना, ७ को मृत्यु ४१ घाइते
• हत्याको विरोधमा भएको बन्दले यात्रुहरु पीडित