एमाले अखिल आफ्नै पार्टी बिरुद्धको आन्दोलनमा

आयोजक कमिटी एकलौटी भएको भन्दै बल्खुमा धर्ना

३० फागुन, काठमाडौं । सार्वजनिक यातायातमा भएको भाडाबृद्धि फिर्ता गर्न माग गर्दै बुधबार बिहान चारघण्टा चक्काजाम कार्यक्रम सकेपछि अरु संगठनका बिद्यार्थी आआफ्ना काममा लागे । एमाले अखिलका विद्यार्थीको प्रदर्शन भने अझै सकिएको थिएन । अरु विद्यार्थी संगठनसँग चक्काजाम कार्यक्रममा सहभागी भएपछि अनेरास्ववियुका एकथरी कार्यकर्ता छुट्टै भेला भए र पार्टी कार्यालय बल्खुतिर लागे । सरकारबिरुद्ध आन्दोलन हैन, आफ्नै पार्टी बिरुद्ध प्रदर्शन र धर्ना गर्न ।

‘पार्टीका विद्यार्थी ईन्चार्जले एकपक्षीय रुपमा आयोजक कमिटी गठन गरेकोले यसलाई सच्याउन माग गर्दै हामीले पार्टी कार्यालयमा धर्ना र प्रदर्शन गरेका हौं’ अनेरास्ववियुकी नेतृ राधिका खतिवडाले अनलाइनखबरसित भन्नुभयो । अनेरास्ववियुको सम्मेलन आयोजक कमिटी गठन एकपक्षीय र त्रूटीपूर्ण रहेकाले त्यसलाई सच्याउन माग गर्दै बिघटित केन्द्रीय कमिटीका आधाजति सचिवालय सदस्यहरुले केही दिनअघि पार्टी अध्यक्षलाई ज्ञापनपत्र बुझाएका थिए । ‘तर ज्ञापनपत्रको सुनुवाई नभएपछि धर्नामा उत्रिन बाध्य हुनुपरेको हो’ खतिवडाले भन्नुभयो ।

बल्खुको धर्ना तथा प्रदर्शनमा सहभागी बिघटित कमिटीका उपाध्यक्षहरु नवराज पौडेल , लक्ष्मण लम्साल, सुधीर साह, नवीना लामा, कोषाध्यक्ष दीपक गौतम लगायतले आयोजक कमिटी तत्काल सच्याउन माग गरेका छन् ।पार्टीका विद्यार्थी इन्चार्ज भानुभक्त ढकालले विवाद समाधान गर्नुको सट्टा झन् बल्झाएको असन्तुष्ट विद्यार्थी नेताहरुको आरोप छ । केपी ओली पक्षीय ढकालले आफ्नो गुटका विद्यार्थीलाई आयोजक कमिटीमा राखेको असन्तुष्टहरुको आरोप छ । पार्टी अध्यक्ष झलनाथ खनाल पक्षका विद्यार्थी नेताहरुले यसरी असन्तुष्टी जनाएका हुन् ।पुस २१ गतेको स्थायी कमिटीको निर्णयबमोजिम गत १९ गते बिघटित कमिटीका ६० प्रतिशतलाई कार्वाही गर्दै २१ औं सम्मेलन आयोजक कमिटी घोषणा गरिएको थियो ।

विवादकै कारण सकृयता घट्दो

एमालेभित्रको क्रियाकलापमा मात्र होइन, सडक प्रदर्शन र रचनात्मक कार्यक्रममा पनि अनेरास्ववियुको भूमिका महत्वपूर्ण मानिन्छ । राजतन्त्र बिरोधी आन्दोलनमा नेविसंघले अखिलका कार्यकर्ताबाट नै पुत्ला बनाउन सिकेका थिए । आन्दोलनको रोचक शैली र तौरतरीका अपनाउन अखिलका कार्यकर्ता खप्पिस मानिन्थे । तर अखिलमा माधव ढुंगेलको नेतृत्व भएपछि संगठनको भूमिका खस्किएको अखिलकै कार्यकर्ता बताउँछन् ।

अहिले सडकमा सरकार बिरुद्धको आन्दोलनमा अखिलका कार्यकर्ता भन्दा नेविसंघकै कार्यकर्ताले नेतृत्व गरेको देखिन्छ । जबकी स्ववियु निर्वाचनमा अरुलाई पछि पारेको अखिलले सडक आन्दोलनमा पनि अगुवाको भूमिका निर्वाह गर्दै आएको थियो । अहिले संगठनभित्र गुटउपगुटको शिकार भएपछि अखिलको यो सकृयता हृवात्तै घटेको छ । विपक्षी दलका अरु विद्यार्थी संगठनसँग सडक आन्दोलनमा ऐक्यबद्धता जनाउँदै आएको अखिल बुधबारदेखि आफ्नै पार्टी बिरुद्धको प्रदर्शनमा जुटेको छ ।

समाचार

• मंसिरमा निर्वाचन नभए सरकारको अस्तित्व सकिन्छः एमाओवादी प्रवक्ता
• पुस्तक मेला- कुन किताब कस्ता छन् ?
• कीर्तिमानी आरोही गौतम भन्छन्-सगरमाथा कालो पहाडजस्तो देखें
• नागदह नियाल्दा (फोटोफिचर)
• राष्ट्रिय स्रष्टा सम्मान वरिष्ठ गीतकार थापालाई