एमाले पत्रकारवीच आरोप-प्रत्यारोप

३० फागुन, काठमाडौं । संविधानसभा चुनावमा दुई-दुई ठाउँबाट पराजित हुँदा नेकपा एमालेका बरिष्ठ नेता माधवकुमार नेपालले कसैलाई आरोप र दोषारोपण लगाउनुभएन । सहजै हार स्वीकार्नुभयो र विजयी हुने आफ्ना प्रतिद्वन्द्वीलाई बधाइ र शुभकामना दिएर नैतिकताका आधारमा पार्टीको जिम्मेवारीसमेत छाड्नुभयो । तर, उनै नेता नेपालका प्रेस सल्लाहकार भएर काम गरिसक्नुभएका एकजना पत्रकारले भने आफ्नो हारपछि एमालेभित्रको भाँडभैलो सबैका सामु उदांगो बनाइदिनुभएको छ ।

यसै साता बिराटनगरमा सम्पन्न अधिवेशनपछि एमाले समर्थित प्रेस चौतारी एक ढिक्का भएको प्रचार गरिए पनि अध्यक्षमा भारी मतले पराजित पत्रकार बिष्णु रिजालको सार्वजनिक असन्तुष्टिले एमालेभित्रको तुषलाई सतहमा ल्याएको छ । अधिवेशनमा आफ्ना प्रतिद्वन्द्वी राजेन्द्र अर्यालभन्दा २ सय कम भोट ल्याएर पराजित रिजालले आफ्नो हारमा सिंगो पार्टी नै लागेको आरोप लगाउनुभएको छ ।

रिजाल आफैं सम्पादक रहेको बुधबार साप्ताहिकमा ‘चौतारीमा निर्लज्ज हस्तक्षेप’ शीर्षकमा लेखिएको छ-’व्यवसायिक पत्रकारहरुको आकर्षण बढ्दै गएको प्रेस चौतारीमा निर्लज्ज हस्तक्षेप गरी एमालेका नेताहरुले तहस-नहस बनाएका छन् । उनीहरुको ठाडो हस्तक्षेपका कारण नेतृत्व गैरपत्रकारका हातमा पुगेको छ ।’

अर्याललाई जिताउन झलनाथ खनाल, केपी ओली, ईश्वर पोखरेल, प्रदीप ज्ञवाली, सुरेन्द्र पाण्डे, अरुण नेपाल, योगेश भट्टराई, ठाकुर गैरे, गोकर्ण विष्ट समेत लागेको समाचारमा उल्लेख छ । यस्तै पत्रकारहरु शम्भु श्रेष्ठ, सूर्य थापा, प्रमोद दाहाल र चौतारीका निवर्तमान अध्यक्ष गगन बिष्ट समेत आफूलाई हराउन लागि परेको रिजालको आरोप छ । ‘बिराटनगरमा दुई गुटका बीच सहमति भएपछि प्रतिनिधिलाई कोठामा बोलाएर राजेन्द्रका पक्षमा कन्भिन्स गर्ने काम प्रदीप ज्ञवाली आफैंले गरेका थिए भने फिल्डमै पुगेर लोभ्याउने, हप्काउने र फकाउने काम सूर्य थापा र प्रमोद दाहालले गरेका थिए’ रिजाल प्रकाशक र सम्पादक रहेको बुधबार साप्ताहिकमा भनिएको छ ।

सामुदायिक रेडियो प्रसारक संघका अध्यक्ष मीनबहादुर शाहीलाई समेत नवधनाढ्य भन्दै रिजालले तीतो पोख्नुभएको छ । नेता प्रदीप ज्ञवालीलाई पनि उत्तिकै झटारो हानिएको छ । ‘भाषण गर्दा र लेख्दा लोकतान्त्रीककरणका मीठा कुरा गर्ने प्रदीप ज्ञवालीको रवैयाबाट पत्रकारहरु थप चकित परेका छन् । प्रचार विभाग कतै लाग्दैन भनेर उनले जति भने पनि प्रचार विभागका सूर्य थापा, शम्भु श्रेष्ठ, प्रमोद दाहाल, मीनबहादुर शाहीलगायत निर्लज्ज रुपमा प्रचारमा लागेको उनले नदेखेझैं मात्र गरेनन्, आफैं पनि आफ्ना पीए (राजेन्द्र अर्याल)को पक्षमा खुलेर लागे’ समाचारमा उल्लेख छ ।

व्यक्तिगत प्रतिष्पर्धा गर्ने भनिए पनि चौतारीको चुनावलाई पुरै गुटबन्दीको अभ्यास गर्ने अवसर बनाइएको बुधबार साप्ताहिकमा छापिएको छ । ‘बिराटनगरमा अधिवेशन उद्घाटन गर्न जाँदा झलनाथ खनालले एयरपोर्टमै विष्णुलाई कुनै हालतमा जिताउन हुँदैन भनेका थिए भने ईश्वर पोखरेलले रातिसम्म रत्ना होटलमा बसेर गगनका नाममा सहमति गर्नु राम्रो, त्यसो नभए राजेन्द्रलाई जिताउनुपर्छ भन्ने निर्देशन दिएका थिए’ रिजाल सम्पादित बुधबार साप्ताहिकमा उल्लेख छ ।

‘दिमाग खुस्केको’

चुनावमा उठेपछि कि जितिन्छ, कि हारिन्छ । यो सबलाई थाहा भएको सर्वमान्य कुरा । हारको पीडा हारिसकेपछि धेरैलाई लाग्छ, हराउन कसैले षडयन्त्र गरेको छ । त्यसैले पराजयपछि धेरैलाई आफ्नो हार स्वीकार्न अप्ठेरो लाग्छ । तर, जे जस्तो भएपनि जित्नेलाई बधाइ र शुभकामना दिने राजनीतिक संस्कार हो । तर, रिजालले आफैं सम्पादक भएको पत्रिकामार्फत् पार्टी नेता र सहकर्मी पत्रकारमाथि रीस पोखेको देख्दा एमालेका नेताहरु चकित भएका छन् । बुधबार साप्ताहिकमा आफूलाई समेत मुछेर खबर आएपछि प्रमोद दाहालले आफ्नो फेसबुक पेजमा लेख्नुभएको छ -’दिमाग खुस्केको पागल सम्पादक भएपछि ।’

समाचार

• मलाई भारतीय दूत भन्नेहरु पागल हुन् : अमरेश सिंह
• संविधानसभाको निर्वाचन मंसिरमै हुन्छ : सिटौला
• साहित्यिक ढर्रा… मञ्च खाली, सहभागी सबै प्रमुख अतिथि !
• लोकतान्त्रिक गणतान्त्रिक गठबन्धनको बैठक बस्दै
• उच्चस्तरीय राजनीतिक संयन्त्रले निर्वाचन विरोधी दलहरुसँग छलफल गर्दै