एमाओवादीमा ५३ पदका लागि ३ सय आकांक्षी

प्रचण्डले दिए नेता छान्ने 'होमवर्क'

८ चैत, काठमाडौं । एकीकृत नेकपा माओवादीमा केन्द्रीय सदस्यका आंकाक्षीहरु सीट संख्याभन्दा कयौं गुणा बढी देखिएका छन् । जारी केन्द्रीय समितिले ५३ जना केन्द्रीय सदस्य मनोनयन गर्ने भएपछि विभिन्न राज्य समितिबाट रिक्त पदसंख्या भन्दा झण्डै ६ गुणा बढीको नाम आइसकेको छ ।

एक सय ५१ सदस्य रहेन केन्द्रीय समितिमा महाधिवेशनले छनौट गरेका ९८ बाहेक ५३ जना मनोनित गर्न बाँकी छ । तर, ५३ सदस्यका लागि विभिन्न राज्य समितिबाट झण्डै ३ सयको नाम आएको प्रवक्ता अग्नि सापकोटाले अनलाइनखबरलाई जानकारी दिनुभयो । ‘५३ जनाका लागि राज्य समितिहरुबाट नाम आएको छ’ सापकोटाले अनलाइनखबरसँग भन्नुभयो-’सोमबार टुङ्गो लाग्छ ।’ स्रोतका अनुसार केही राज्य समितिले अझै नाम बुझाउन बाँकी छ ।

पार्टी कार्यालय पेरिसडाँडामा बिहीबार बसेको केन्द्रीय समितिको बैठकमा अध्यक्ष प्रचण्डले सोमबारसम्म गृहकार्य गरेर नामहरु सिफारिस गर्न निर्देशन दिनुभएको छ । ‘अध्यक्षले होमवर्क दिएर जानु भएको छ’ एक राज्य समिति इन्चार्जले भने- ‘केन्द्रीय सदस्यहरुका लागि सिफारिस गर्न हामी होमवर्कमा जुटेका छौं ।’

नेताहरुले सिफारिस गरेको नामावली महासचिव पोष्टबहादुर बोगटीलाई जिम्मा लगाइएको स्रोतले बतायो । केही नेताले नाम बुझाइसकेको भए पनि केही राज्यबाट अझै नाम बुझाउन बाँकी रहेकाले केन्द्रीय सदस्यको आकांक्षी संख्या अझ थपिन सक्ने नेताहरु बताउँछन् ।

हेटौंडामा माघ अन्तिम साता सम्पन्न महाधिवेशनले १ सय ५१ सदस्यीय पूर्ण केन्द्रीय समिति बनाउने र आवश्यकताअनुसार बैकल्पिक केन्द्रीय सदस्य थप्न सकिने निर्णय गरेको थियो । महाधिवेशन प्रतिनिधिले केन्द्रीय समिति दुई अंकको बनाउन सुझाव दिए पनि अध्यक्ष प्रचण्ड र उपाध्यक्षद्वय डा. बाबुराम भट्टराई र नारायणकाजी श्रेष्ठ प्रकाशबीच भागबण्डा मिलाउनु पर्ने भएपछि जम्बो बन्ने पक्का भएको छ ।

एक नेताका अनुसार केन्द्रीय सदस्यमा ५३ जनाको मनोनय गरिने र नामको चापलाई विचार गरी करिब १ सय ४८ जनालाई बैकल्पिक केन्द्रीय सदस्य बनाइने सम्भावना छ ।

बैठकै नराखी नाम सिफारिस

राज्यका तर्फबाट केन्द्रीय सदस्यको नाम सिफारिस गर्न इञ्चार्ज र ब्यूरो प्रमुखहरुलाई निर्देशन दिइए पनि यसबारे राज्य कमिटीको बैठक भने नबोलाइएको नेताहरुले बताएका छन् । ‘राज्यका इञ्चार्ज र ब्यूरो प्रमुख मिलेर क-कसको नाम सिफारिस गरेका छन्, हामीलाई जानकारी छैन ।’- केन्द्रीय समितिमा नरहेका एक राज्य समिति सदस्यले अनलाइनखबरसँग भने-’अहिले पनि राज्य इञ्चार्जहरुसँग पहिलेको गुटको ह्याङओभर बाँकी नै छ, त्यसैका आधारमा नाम सिफारिस गरिएको हुन सक्छ ।’

समाचार

• कञ्चनजंघा आरोहण गरेर फर्कदै गरेका पाँचको मृत्यु
• शिक्षकले चिट चोर्ने डरले परीक्षामा कडाई !
• संविधानसभा अगाडि गाई बहुलायो (भिडियोसहित)
• योजना आयोगको उपाध्यक्षमा शाक्य, सुकुम्बासी आयोग खारेज
• पहिलो मिसनमै सरकार असफल भईसक्योः एमाले सचिव