मूर्ति व्यापारीलाई धम्क्याएर रकम असुल्ने ३ प्रहरी पक्राउ

८ चैत, काठमाडौं । मूर्ति व्यापारीलाई धम्क्याएर रकम असुलेको अभियोगमा महानगरीय प्रहरी परिसर काठमाडौंका तीनजना प्रहरी पक्राउ परेका छन् ।

महानगरीय प्रहरी अपराध महाशाखा र महानगरीय प्रहरी वृत्त बौद्धको टोलीले परिसरको विशेष टोलीका २ जना नायब निरीक्षक र १ जना सहायक निरीक्षकलाई पक्राउ गरेको हो । पक्राउ पर्नेमा अपराध अनुसन्धान महाशाखाका सइ रुद्रनाथ पौडेल, प्रकाश मल्ल र असइ राजु भण्डारी रहेका छन् ।

प्रहरी प्रवक्ता केशव अधिकारीका अनुसार चैत ४ गते प्रहरी हुँ भन्दै ५ जनाको समूहले बौद्ध कुमारीगालका व्यापारीद्वय कर्ण लिम्बु र सूर्यमान तामाङलाई धम्क्याएर २ लाख ६१ हजार नगद, मोटरसाइकल र एक थान मोबाइल सेट लिएका थिए । लिम्बु र तामाङ मूर्ति तस्करी र कारोबारमा संलग्न रहेको भन्दै उनीहरुले चार लाख रकम मागेका थिए ।

थप रकम मागेपछि कर्णकी श्रीमतीले कमलादीस्थित एनआइसी बैंकबाट रकम लगेकी थिइन् । रकम लिन कर्णकी श्रीमतीसँगै आएका व्यक्ति बैंकको सीसी टीभीमा देखिएको र अनुसन्धानका क्रममा उनी रुद्रनाथ भएको खुलेको थियो । उनलाई पक्राउ गरेपछि थप दुईजना पनि संलग्न भएका खुलेको प्रहरी प्रवक्ता अधिकारीले जानकारी दिनुभयो । उनीहरुका साथबाट ५० हजार नगदसमेत बरामद भएको छ ।

प्रहरीका अनुसार उनीहरुलाई अपहरणसम्बन्धी मुद्दा चलाइनेछ । बिहीबार जिल्ला अदालतमा उपस्थित गराएर ६ दिनको म्याद थपिएको प्रहरीले जनाएको छ ।

समाचार

• मंसिरमा निर्वाचन नभए सरकारको अस्तित्व सकिन्छः एमाओवादी प्रवक्ता
• पुस्तक मेला- कुन किताब कस्ता छन् ?
• कीर्तिमानी आरोही गौतम भन्छन्-सगरमाथा कालो पहाडजस्तो देखें
• नागदह नियाल्दा (फोटोफिचर)
• राष्ट्रिय स्रष्टा सम्मान वरिष्ठ गीतकार थापालाई