फिलिपिन्सको मुन्टिनलुपा सिटीको अलाबाङस्थित भर्साइल्स् प्यालेसमा भोली शनिबार हुने मिस अर्थको १३ औं संस्करणमा नेपालका तर्फबाट सहभागी रोजिशा शाहीलाई सिल्भर मेडल प्राप्त भएको छ ।
उनलाई लङ गाउन कम्पिटिसनमा सिल्भर मेडल प्राप्त भएको हो । यसअघि प्रारम्भिक चरणको प्रतिस्पर्धात्मक ‘टास्क वर्क’अन्तर्गत रोजिशाले आफ्नो नाममा एउटा गोल्ड मेडल सुरक्षित गरिसकेकी छिन् । रोजिशाले चाइल्ड फ्रेन्डली विधाको ग्रुप एवार्डमा उक्त गोल्ड मेडल हात पारेकी हुन् ।
ललितपुर निवासी २० वर्षिय रोजिशाले मिस नेपाल २०१३ मा फस्ट रनर्सअपको उपाधि जितेपछि मिस अर्थ २०१३ मा नेपालका तर्फबाट सहभागिता जनाउने अवसर पाएकी हुन् ।
विश्वव्यापी रुपमा वातावरण संरक्षण अभियानका लागि नेतृत्वदायी भूमिका निर्वाह गर्न सक्ने सुन्दरीको खोजीमा सञ्चालन हुँदै आएको मिस अर्थको यस पटकको संस्करणमा नेपाललगायत विश्वका ९० वटा मुलुकको सहभागिता छ ।
