विजय आवाज
आकर्षक हेयर स्टाइल, युवतीलाई मोहित पार्ने रुप । झट्ट हेर्दा र सुन्दा नायक आर्यन सिग्देलको जीवन धेरैका लागि लोभलाग्दो छ । एउटा सिनेमा खेलेको ८ लाख रुपैयाँसम्म लिने हिरोको रुपमा परिचित भएपछि त उनको कमाइ धेरैलाई डाहा पनि लाग्छ होला ।
नेपालमा चर्चित ब्यानरमा काम गरेकै छन् । गाडी चढेकै छन् । दिनहुँ मिडियामा समाचार पनि आएकै छ । साँच्चै आर्यन सिग्देल बन्न चाहनेहरुको भीड पनि यहाँ कम छैन ।
जति लोभलाग्दो छ कलाकारको जीवन, दुनियाँ उति नै फरक । हरेक दिन समाचारको पान्नाभित्र कस्ता तस्वीर र विषय पोतिने हो थाहा हुँदैन । एकैछिनमा हाँसो त एकै छिनमा दिक्दारीको बादलले छोइदिन्छ ।
“करिब १८ लाख रुपैयाँ त निर्माताहरुबाट लिनै छ” एक भेटमा नायक आर्यन सिग्देल यस्तै दुखेसो पोखिरहेका थिए । जीवन र स्टाइललाई आपसमा फरक बनाउन नसकेकोमा कुरा काट्नेहरुको कमी पनि छैन उनको । “मनलाई सम्हाल्न सक्नुपर्छ तर कहिलेसम्म ?” आर्यन प्रश्न गर्छन् “कहिलेकाँही त सिनेमा नगरीबाट नै धेरै पर जाऊँजस्तो लाग्छ ।’ तर परको दुनियाँले उनलाई जस्तो देख्छ, नजिकको संसार भने निक्कै भिन्न छ ।
आर्यनको दिक्दारी चरम सिमामा पुगिसकेको छ । “बेअर्थको कुरा काट्ने धेरै भए” उनले फेरि थपे “अगाडि ठिक्क पारेर पछाडि कुरा काट्नेको जमात धेरै भयो, कामप्रतिको लगाव हट्दै जानुको मुख्य चुरो यही नै हो” ।
मानिसको स्वभाव र बुझाइ फरक हुन्छ । काम गराइ पनि फरक हुन्छ । आर्यन पनि यस्तै मध्ये एक हुन् । “गाडी नचढूँ, अनेक कुरा ओकल्छन्, चढूँ आफ्नो मेहनतले कमाएको पैसा दिने छाँटकाँट कसैले देखाउँदैन” उनले गुनासो गरे “आखिर एउटा हिरो कसरी टिकिरहन सक्छ ? ”
गफैगफको क्रममा आर्यनको आफैंप्रति सल्किएको उक्साहट धेरै माथि पुगिसकेको थियो । । तर पनि उनी सम्हालिए । सिनेमा नगरीप्रति उनको माया अथाह छ । “केही फरक गरौं भनेर कम सिनेमा खेल्यो, आर्यन फ्लप भन्नेहरुको संख्या ह्वात्तै बढ्छ । सिनेमा नचल्नुमा गल्ती मेरोमात्र होइन” उनले थपे “जे सोचेर सिनेमा छान्छु, फ्लोरमा धेरै फरक पाउँछु, अनि के गर्ने ?”
आफूलाई हिरो बनाउन अर्कोलाई पातलमा पुर्याउने मान्छेको शिकार उनी भएको उनको कुराबाट स्पष्टै हुन्थ्यो । ‘आफू राम्रे बने भैहाल्यो, तर किन अर्कोलाई नराम्रो देखाउनु’, आर्यनले प्रश्न गरे । उनी यस्तो संकारमा हुर्केका होइनन् । आफ्नै जीवनमा रमाउने आर्यन आज कताकता हराएको भान हुन्छ । आज हिरो आर्यन सिग्देलको जीवन बाचिरहेका छन् उनले । तर उनी चाहन्छन् थानकोटको हरिस सिग्देलको जीवन फेरि पनि बाँचु ।
एउटा हिरोको पनि मन हुन्छ, उसलाई पनि मिठो जीवनको कल्पना हुन्छ । समाजमा राम्रै कुरा सुन्न पाउँ भन्ने चाहना राख्छ । तर विना कारण कुरा काटिदिने सिने नगरी र त्यसकै पछि लाग्ने मानिसहरुको भेलमा उनी पर्छन् । यस्तै यस्तै कुराले उनको मन तोडिन थालेको छ । सायद सिनेमा नगरीका लागि हरेक पल सोच्ने एउटा हिरो कुनै दिन यो रंगिन दुनियाँबाट टाढा जान पनि सक्छ । आर्यनको दुखेसोले यस्तो छनक दिन थालेको छ ।
