३० असार, काठमाडौं । अर्थमन्त्री डा. रामशरण महतले व्यवस्थापिका संसदमा बजेट वक्तव्य दिइरहेका बेला कोही सभासदहरु हातमा चिउँडो अड्याएर निदाइरहेका भेटिए ।
व्यवस्थापिका संसदमा आइतबार सभासदहरुको गतिविधि देख्दा यस्तो लाग्थ्यो, सरकारी बजेट एउटा यस्तो ‘स्लिपिङ ट्याब्लेट’ हो, जुन ट्याब्लेट संसदमा प्रस्तुत हुनासाथ सभासदहरुलाई निद्राले लठ्ठ बनाइहाल्छ ।
अर्थमन्त्री महतले बजेट मन्तव्य व्यक्त गरिरहेका बेला कोही सभासद मस्त निदाएका थिए भने कोहीचाहिँ कुर्सीमा टाउको अड्याउँदै कुप्री परेर फोनमा गफ गरिरहेका देखिन्थे ।
राज्यलाई कर नबुझाएका कारण आन्तरिक राजस्व कार्यलयको सूचीमा परेकी सभासद गीता राणा अर्थमन्त्रीले बजेट भाषण गरिरहँदा आफ्ना सहयात्री सभासद एवं प्रिन्सिपल बाबुराम पोखरेलसँग मोबाइलमा केही पढिरहेको अवस्थामा भेटिइन् ।
एमाले अनुशासन आयोगको अध्यक्षमा उम्मेद्वारी दिएका सभासद केशव बडालले व्यवस्थापिका संसदभित्र अनुशासनको कुनै ख्याल नगरी एमाले मतगणनास्थलमा फोन गरेर मतसंख्या टिपिरहेको जस्तो दृश्य देखिएको थियो ।
व्यवस्थापिका संसदमा कोही सभासद मुख थुनेर फोन गरिरहेका त कोही मुख छोपेर निदाइरहेका थिए । सामान्य प्रशासन मन्त्री लालबाबु पण्डित पनि निदाएका हुने या आँखा चिम्लेर ध्यान गरिरहेका हुन् भन्ने बुझ्न सकिएन । संसदमा मोबाइल खेलाउनेहरुमा पूर्वकानूनमन्त्री प्रेमबहादुर सिंह पनि देखिएका थिए ।
अर्थमन्त्रीले बजेट भाषण गरिरहेका बेला व्यवस्थापिका संसदभित्र अनलाइनखबरका लागि श्रीधर पौडेलले कैद गरेका केही दृश्य यस्ता छन्-
