१२ साउन, काठमाडौं । केही मधेश केन्दि्रत दलका नेताहरुले भारतीय विदेशमन्त्री सुष्मा स्वराज समक्ष आफूहरु नेपालमा दोस्रो दर्जाको नागरिक भएको भनी दिएको अभिव्यक्तिबारे व्यवस्थापिका संसदमा प्रश्न उठेको छ । सत्तारुढ नेपाली कांग्रेसका सभासद रामहरी खतिवडाले त्यस्तो अभिव्यक्ति दिने व्यक्ति नेपाली हुन नसक्ने बताए ।
सभासद खतिवडाले विदेशीसामु झुकेर नेपालमा हस्तक्षेप गरिदेऊ भन्नु, आफूहरु दोस्रा दर्जाको नागरिक भएको भन्नु राष्ट्रघाती मानसिकताको उपज हो भने । ‘भारतीय विदेश मन्त्रीसँगको सामुहिक भेटमा जे कुरा उहाँहरुले राख्नुभएको छ, त्यसले हाम्रो शीर निहुराएको छ’ खतिवडाले भने । सो भेटमा कांग्रेस सभासद अमरेशकुमार सिंह पनि थिए ।
यसैबीच कांग्रेस सभासद सिंहले भने त्यस्तो कुरा कसैले नगरेको बताएका छन् । संसद भवन परिसरमा पत्रकारहरुसँग कुरा गर्दै गलत प्रचार गरिएको उनले बताए । ‘एकजनाले त्यो आशय व्यक्त गरे पनि खासमा विषयान्तर भयो’ उनले भने ।