बर्खा लागिसक्दा पनि पानी नपरेर खडेरि परेपछि वर्षाका देवता इन्द्रदेवलाई खुसी बनाउन भन्दै हाम्रो देशमा पनि विभिन्न खाले परम्परागत जुक्ति लगाइन्छ । कतै महिलाले दौरा सुरुवाल लगाएर हलो जोत्छन् त कतै महायज्ञ लगाइन्छ भने कतै बाजागाजा सहित भ्यागुताको बिहे गरिदिने चलन पनि छ । यो वर्ष पनि कञ्चनपूर तथा तेह्रथुम लगायतका जिल्लाका बासिन्दाले पानीको कामना गर्दै भ्यागुताको बिहे गरिदिएका समाचार आइरहेका छन् । पानी पार्नका लागि भ्यागुताको बिहे गर्ने चलन हाम्रो देशमा मात्र होइन भारतमा पनि छ ।
भारतको आसाम राज्यस्थित डिब्रुगढ गाउँमा पनि हालै भव्य रुपमा भ्यागुताको बिहे सम्पन्न भएको छ । लामो खडेरीका कारण चिन्तित बनेका गाउँलेहरुले विवाह मण्डप तथा पूजाआजा नै गरेर एक जोडि भ्यागुताको बिहे गरिदिए ।
स्थानीय नेता रञ्जन दासले देवता खुसी बनाउनका लागि आफुहरुले भ्यागुता विहे समारोहको आयोजना गरेको बताए ।
एउटा गाउँको भाले भ्यागुतो र अर्को गाउँको पोथी भ्यागुतोबीच विवाह गराइएको थियो ।
२७ जुनमा भएको विवाह समारोहमा आसपासका ४ गाउँका मानिस भेला भए र ६ घण्टासम्म बिहे कार्यक्रम चल्यो । स्थानीय एक वगैँचामा विहे कार्यक्रम भयो । समारोहमा बेहुला र बेहुली भ्यागुतालाई परम्परागत पहिरन र रंगमा सजाइएको थियो । बेहुली भ्यागुतालाई स्थानीय गाउँलेले सुनको सिक्री दाइजो दिए । विवाह गरेपछि दुलाहा दुलही भ्यागुतालाई नजिकैको पोखरीमा लगेर सँगै छाडियो ।
समाचार अनुसार अघिल्लो दिन भ्यागुताको बिहे गरेपछि अर्को दिनबाट त्यहाँ वर्षा सुरु भएको छ । विवाहित भ्यागुताले इन्द्र देवतालाई सन्देश पूराएको स्थानीय बासिन्दाले बताएका छन् ।
