१४ साउन काठमाडौं । पुँजी बजारका लगानीकर्ता सतर्क भएपछि नेप्सेमा सुधार भएको छ । प्रष्ट आधारबीना नेप्से उछालिएसँगै जोखिम उत्पन्न हुने भन्दै लगानीकर्ताले सजगता अपनाएका हुन् ।
सरोकारवालाहरुले लगानीकर्तालाई सतर्क रहन अनुरोध गर्दै आएका थिए । यो सातादेखि लगानीकर्ताले उच्च सतर्कता अपनाएका छन् । आइतबार र सोमबार घटेको नेप्से बुधबार पनि १०.३८ अंकले घट्दै एक हजार ६२ दशमलब ४४ अंकमा झरेको छ ।
सूचिकृत कम्पनीहरुको वित्तीय विवरण प्रकाशित हुने समय आएकाले वित्तीय विवरण सार्वजानिक नभएसम्म लगानीकर्ताहरु पर्ख र हेरको अवस्थामा रहेको हुनसक्ने विश्लेषकहरुले बताएका छन् ।
बुधबार नेप्सेमा १ सय ५६ कम्पनीका १३ लाख ५२ हजार कित्ता सेयर ७६ करोड ३२ लाख रुपैयाँमा किनबेच भयो । गत साताका दिनहरुको तुलनामा यो निकै कमी हो । गत साता एकै दिनमा एक अर्ब रुपैयाँभन्दा बढीको कारोबार भएको थियो ।
बुधबार होटल, जलविद्युत र फाइनान्स बाहेक सबै समूहगत उपसूचकहरु घटेका छन् । होटल समूहको उपसूचक ६९.६२ अंकले बढेको छ भने जलविद्युत समूहको ०.४८ अंकले र वित्त कम्पनी समूहको ६.२८ अंकले बढेको छ । यो दिन वाणिज्य बैंक समूहको सूचक १५.४३ अंकले घटेको छ भने बीमा समूहको सूचक ६६.३४ अंकले घटेको छ ।
विकास बैंक समूहको ४.८९ अंकले र उत्पादनमूल समूहको उपसूचक १४.०१ अंकले घटेको नेप्सेले जनाएको छ ।