४ भदौ, पर्वत । कुश्मा-ज्ञादी झोलुङ्गे पुलबाट हामफालेर एक युवाले आत्महत्या गरेका छन् । पर्वतको ठूलीपोखरी गाविस-५ झाँक्रीखोलाका १८ वर्षीय प्रताप सापकोटाले बुधबार बिहान पुलबाट हामफालेर आत्महत्या गरेका हुन् ।
घरबाट कुश्मा जान्छु भनी हिँडेका सापकोटाले कुश्मा-ज्ञादी झोलुङगे पुलको छेवैमा रहेको एक होटलमा चुरोट पिएपछि लगत्तै पुलमा पुगेर हाम फालेको प्रत्यक्षदर्शीले जानकारी दिए ।
पारिवारिक स्रोतका अनुसार उनले बिहान सदरमुकाम जान्छु भनी आमासँग १० हजार मागेका र आमाले आफूसँग पैसा नभएको भनेपछि रिसाउँदै घरबाट निस्किएका थिए ।
मृतक युवकको शव परीक्षणका लागि जिल्ला अस्पताल पर्वत ल्याइएको जिल्ला प्रहरी कार्यालय पर्वतले जनाएको छ । रासस
