१२ भदाै, काठमाडाैं । हरितालिका तीज पर्वका अवसरमा बिहीबार पशुपतिनाथको मन्दिरमा हिन्दूधर्मावलम्बी नारीहरूको घुइँचो लागेको छ । मुखमा पानी समेत नहाली निराहार ब्रत बसेका नारी रातो पोशाकमा सजिएर पशुपतिनाथमा पुग्दा त्यहाँको वातावरण रमित लाग्दो बनेको छ ।
बालिकादेखि वृद्दा र अविवाहितदेखि विवाहित नारीले पशुपतिनाथमा पुगेर भगवान शिवको दर्शन गरेका हुन् । अविवाहितले योग्य पति पाउँ भन्दै ब्रत बस्ने चलन छ भने विवाहित पतिको दीर्घायू र सुस्वास्थ्यको कामना गर्दै ब्रत बसेका हुन् ।
विहानैबाट भोकै पशुपतिनाथ पुगेको केही नारी लाइनमा बसेकै बेला बेहोस भएर ढले । धेरैजसो नारी कम्मर मर्काइ मर्काइ नाचिरहेका थिए । खाली पेटमा मन्दिर परिसर पुगेका केही नारी स्वास्थ्य शिविरमा स्वास्थ्य जाँच गराइरहेका थिए ।
ब्रत बसेका नारीहरू पशुपति मन्दिर परिसरमा सबै दुःख विर्सेर नाचेको हेर्न रमितेको पनि उत्तिकै बाक्लो भींड थियो । तीजका गीतको लयमा कम्मर मर्काउन बालिकादेखि सेतै कपाल फूलेका वृद्दा पनि अघि सरेका थिए ।
तस्बीरहरू : विकास श्रेष्ठ र अजय मर्जन/अनलाइनखबर
