शरद रेग्मी
१५ भदौ, दाङ । नेकपा एमालेका उपाध्यक्ष युवराज ज्ञवालीले सरकारको गति सुस्सत हुँदा राज्यका महत्वपूर्ण काम प्रभावित भएको बताएका छन् । उपाध्यक्ष ज्ञवालीले बाढीपीडितलाई राहात वितरण प्रभावकारी नभएको भन्दै सरकारको आलोचना गरेका हुन् ।
रिपोटर्स क्लब दाङले तुलसीपुरमा आइतबार गरेको सात्क्षात्कारमा एमाले उपाध्यक्ष ज्ञवालीले संविधान निर्माणले गति लिन नसक्नुमा पनि सरकारको सुस्तता भएको आरोप लगाए ।
‘सरकार मन्द गतिमा चल्दा राज्यका महत्वपूर्ण काम प्रभावित भएका छन्’, ज्ञवालीले भने, ‘बाढी पीडितलाई राहात र पुनःस्थापन तथा संविधान निर्माणमा तीब्रताका साथ लिनुपर्ने पहलकदमी लिननसक्दा तोकएको समयमा संविधान बन्न सक्ने अवस्था छैन ।’
क्यालेन्डरमा हेरफेर भएपनि माघ ८ मै संविधान जारी गर्न दलहरु प्रतिबद्ध रहनुपर्ने ज्ञवालीको जोड थियो । ‘मस्यौदा समितिको उपाध्यक्ष म हुँ, दलहरुको पहिलो प्राथमिकता सहमतिमा संविधान जारी गर्नू हो’, ज्ञवालीले भने, ‘त्यो संभव नभए प्रकृयामा गएरै संबिधान जारी हुन्छ । कतिपय विषय जटिल छन् तिनलाई जनमत संग्रहमा गएर टुङग्याउनुपर्छ ।’
दलबीचमा राज्यको पुनःसंरचना, शासकीय स्वरुप र निर्वाचन प्रणालीमा फरक मत रहेकाले त्यसलाई मिलाउन शीर्ष नेतृत्व लागिरहेको उनले जानकारी दिए ।
राजनीतिक समितिमा आलोपालो अध्यक्ष
एमाओवादी अध्यक्ष प्रचण्डलाई उच्चस्तरीय राजनीतिक समितिको अध्यक्ष बन्न नदिन आफूहरुले विरोध नगरेको उपाध्यक्ष ज्ञवालीको भनाइ छ । ‘उच्चस्तरीय राजनीतिक समितिमा प्रचण्ड आउँदा हामीले विरोध गरेको होइन’, उपाध्यक्ष ज्ञवालीले भने, ‘समितिको अध्यक्षता आलोपालो गर्नुपर्छ भन्न खोजेका हौं ।’
संसदले राष्ट्रपति चिन्नुपर्छ
नेकपा एमालेले राष्ट्रपति र उपराष्ट्रपतिलाई चिन्दिन भनिरहेका बेला उपाध्यक्ष ज्ञवालीले सात बुँदे सहमति अनुसार अघि बढ्नुपर्ने बताए । ‘सातबुँदे सहमतिमा हस्ताक्षर गर्ने कांग्रेस बच्चा पनि होइन, उसलाई झुक्काएर सहमति भएको होइन’, उपाध्यक्ष ज्ञवालीले भने, ‘त्यसैले त्यो सहमति कार्यान्वयन हुनुपर्छ, संसदले राष्ट्रपति चिन्न पाउनुपर्छ ।’