१ असोज, काठमाडौं । भक्तपुर जिल्ला अदालतले हत्या लगायतका मुद्दामा कुख्यात अपराधी चाल्र्स शोभराजलाई सर्वश्वसहित जन्मकैदको सजायँ सुनाएको छ ।
न्यायाधीश नगेन्द्रलाल कर्णको इजलासले क्यानडेली नागरिक लोरेन्ट क्यारियरको हत्या आरोपमा दोषी ठहर गर्दै शोभराजलाई जन्मकैदको फैसला सुनाएको हो ।
अदालतमा शोभराज र उनको वकिल सकुन्तला थापा उपस्थिति नभएपछि जिल्ला अदालतले वैतनिक वकिलको रुपमा हरि राउतलाई बहस गराएर मुद्दाको फैसला गरेको थियो ।
शोभराज अहिले काठमाडौं गोलघरमा जेलमा छन् । विकिनी किलरका रुपमा चिनिएका शोभराजले २०३२ साल पुस ६ मा लोरेन्टको हत्या गरेका थिए ।
लोरेन्टको शव टुक्रा पारी भक्तपुरको मनोहरा खोला र नंखेल गाविस पलाँसेमा फ्याकिएको अबस्थामा भेट्टाइएको थियो । २०६० सालमा काठमाडौंबाट शोभराज पक्राउ परेपछि प्रहरीले मुद्दा चलाएको थियो ।
