३ असोज, मेलम्ची । नेपालीहरूको महान् चाड दसैँ तिहार नजिकिँदै गर्दा सिन्धुपाल्चोक जिल्लाको पश्चिमी क्षेत्रमा रहेको मुख्य केन्द्र मेलम्ची बजारमा अहिले निकै चहलपहल बढेको छ ।
वैदेशिक रोजगारीका लागि विदेशिएका युवायुवतीको आगमनले अहिले थप उत्साह थपिनुका साथै आर्थिक गतिविधिमा वृद्धि भए पनि मूल्यवृद्धिको मार खेपिरहनुपरेको स्थानीय प्रकाश दाहालले बताए ।
उनका अनुसार गत साउन ११ गते राम्चेको जुरेमा गएको पहिरोका कारण अरनिको राजमार्ग अवरुद्ध भएपछि चीनको तिब्बतबाट तातोपानी भन्सार हुँदै आउने मालसामान आउन नसकेपछि मूल्यवृद्धि अकासिएको हो । गत वर्षको तुलनामा यस वर्ष थप मूल्यवृद्धि भएको छ ।
चाडबाडको बेला मूल्यवृद्धि भइरहँदा पनि सरकारले कुनै चासो नदेखाएकोप्रति स्थानीय आक्रोसित भएका स्थानीय बासिन्दा प्रहृलाद चालिसेले बताए ।
सिन्धुपाल्चोकको पश्चिम क्षेत्रमा अवस्थित बजारहरूमध्ये मेलम्ची मुख्य बजार हो । रासस
