चिनियाँ राष्ट्रपति सी जिनपिङ लाई इलाभेन जिनपिङ भन्ने एक भारतीय पत्रकारले जागिरबाट हात धुनुपरेको छ ।
भारतको सरकारी टेलिभिजन दूरदर्शनमा समाचार वाचिकाको रुपमा कार्यरत महिला पत्रकारले बुधबार बेलुकी भारत भ्रमणका रहेका सी जिनपिङलाई भुलवस इलाभेन जिनपिङ भन्दै समाचार पढेपछि त्यसले चर्चा पाएको थियो ।
सी Xi लाई रोमनमा उच्चारण गर्दा इलाभेन अर्थात् एघार हुने भएकाले ती समाचार बाचिकाले चिनिया राष्ट्रपतीको नाम इलाभेन बनाइदिइन् ।
भारतको राष्ट्रिय सरकारी संचार माध्यममा कार्यरत समाचार वाचिकाले छिमेकी देशको चर्चित राष्ट्रपतिको नाम समेत नजान्नु निकै लज्जास्पद रहेको भन्दै धेरैले टिप्पणी गरेका थिए ।
दूरदर्शन टेलिभिजनकी समाचार प्रमुख अर्चना दत्तले पत्रकारको त्यो गल्ती अक्षम्य रहेको भन्दै उनलाई जागिरबाट हटाइएको पुष्टि गरिन् ।
उनका अनुसार ती समाचार वाचिका दूरदर्शनकी नियमित समाचार वाचिका नभएर कामचलाउ अर्थात् भैपरी आउँदा समाचार भन्ने कर्मचारी हुन् ।