४ कात्तिक, काठमाडौं । गोल गरेको खुसीयाली मनाउने क्रममा एक भारतीय फुटबल खेलाडी पीटर वियाकसैगजुआलाको मृत्यु भएको छ । बेथलेहम बेंग्थलेंग एफसीको तर्फबाट चानमारी बेस्ट एफसी विरुद्ध बराबरी गोल फर्काएलगत्तै २३ बर्षीय खेलाडी पीटरको मृत्यु भएको हो ।
गोल गरेलगत्तै उनले हावामा जिम्नास्टिङ गरेका थिए । तर, जिम्नास्टिङ गर्ने क्रममा उनको ढाडको हाड भाँचिएको थियो । त्यसपछि मैदानमै लडेका उनलाई अस्पताल भर्ना गरिएको थियो । चिकित्सकहरुले उनको शल्यक्रिया गरे पनि बचाउन भने सकेनन् ।
जुन खेलमा उनलाई चोट लागेको थियो त्यो मिजोरम प्रीमियर लीगको एक राज्यस्तरीय खेल थियो ।
मिजोरम प्रीमियर लीगको आधिकारीक फेसबुक पेजमा लेखिएको छ, ‘मिजोरमका फुटबल जगतको लागि यो दुःखद दिन हो । फुटबल खेलाडीको निधनले उनको टीमका सबै साथीहरु, खेलाडी तथा प्रशंसकहरुमा हलचल पैदा गरेको छ ।’
‘पीटर एक रक्षात्मक मिडफिल्डर थिए । हमेशा आक्रामक खेल खेल्ने उनी एक सच्चा खेलाडी थिए,’ मिजोरमको फेसबुक पेजमा लेखिएको छ ।
पीटरले २१ नम्बरको जर्सि लगाएर खेल्थे । अबदेखि २१ नम्बर जर्सी कसैले पनि नलगाउने गरी बेथलेहम वेङ्गथलेङ्ग क्लबले निर्णय गरेको छ ।
बेथलेहम एफसी उत्तरपूर्व भारतको एक क्लब हो ।
भिडियो पनि हेर्नुहोस्