७ कात्तिक, क्वाललाक्म्पुर । संयोग नै मान्नुपर्छ, कप्तान पारस खड्काको २७ औं जन्मदिन नेपालले डिभिजन थ्री क्रिकेटमा पहिलो जित हात पारेको छ ।
बर्मूडालाई १०० रनमा अलआउट गरेको नेपालले ११.१ ओभरमा मात्र २ विकेट गुमाएर लक्ष्य भेट्टायो । खेलमा नेपालका बलरहरू चिम्किए भने व्याट्सम्यानले जिम्मेवारी पूरा गरे ।
समाचार पढ्नुस् : डिभिजन थ्रीमा नेपालको पहिलो जित, बर्मूडा ८ विकेटले पराजित
कप्तान खड्का नेपालले क्षमता अनुसारको प्रदर्शन गरेका कारण बर्मूडाविरुद्ध ८ विकेटको सहज जित सम्भव भएको बताउँछन् । उनले भनेका छन्-‘बलरहरुले राम्रो प्रदर्शन गरे, व्याट्सम्यानहरुले पनि आफ्नो जिम्मेवारी पूरा गरे । हाम्रो टीमको क्षमता भएकै यहि हो । यो प्रदर्शनलाई दोहोर्याउनुपर्छ हामीले ।’
पहिलो दिन अपेक्षा गरिए अनुसार नेपाली टोलीको प्रदर्शन हुन नसक्दा खेल हेर्न मैदान पुगेका दर्शकहरु निराश थिए ।
शुक्रबारको खेलमा दर्शक केही कम थिए तर, उपस्थित दर्शकको उत्साह कम थिएन । उनीहरू अधिकांश समय नेपाली टीमलार्इ साथ दिन व्यस्त रहे ।