१० कात्तिक, काठमाडौं । एकीकृत नेकपा माओवादी सहित २२ दलले आयोजना गरेको चियापान तथा शुभकामना आदान प्रदान कार्यक्रम नेकपा एमाले अध्यक्ष केपी ओलीले बहिस्कार गरेका छन् ।
दिपावली, नेपाल सम्वत्, छठ, ईद, ल्होसार लगायतका चाडपर्वको अवसरमा २२ दलीय मोर्चाले सोमबार काठमाडौंको भृकुटीमण्डपमा आयोजना गरेको चियापान कार्यक्रम ओलीले बहिस्कार गरेका हुन् ।
एमाओवादी नेतृत्वको मोर्चाले दिएको निम्तोलाई ओलीले लत्याएपछि मोर्चाका संयोजक तथा एमाओवादी अध्यक्ष प्रचण्डले दुःखेसो पोखे ।
‘उहाँ (ओली) आइदिएको भए राम्रो हुन्थ्यो तर आउनु भएन,’ चियापान कार्यक्रममा सन्चारकर्मीलाई प्रतिक्रिया दिदै प्रचण्डले भने, ‘कांग्रेसले, एमालेले गरेको चियापान कार्यक्रममा हामी सहभागी भएका थियौं, ओली जी नआए पनि माधव नेपाल जी आउनु भएको छ, मैलै सिंगो एमाले नै आइदिएको ठानेको छु।’
प्रचण्डले सबै दल सहमतिमा अघि बढ्नुपर्ने र संविधान पनि सहमतिमा जारी गर्नुपर्ने दोहोर्याए । उनले भने, ‘नेपालका राजनीतिक दलहरु बाझ्न पनि र मिल्न पनि जानेका छन्, यो देखेर विश्व पनि चकित छ ।’
यसैगरी एमाले नेता माधव नेपालले पनि सहमतिको आधारमा माघ ८ मै नयाँ संविधान जारी गर्नुपर्ने बताएका थिए ।
