बलिउड अभिनेतृ एवं मिस युनिभर्स १९९४ सुस्मिता सेन नेपाल भ्रमण निकै अबिस्मरणीय रहेको बताउँछिन् । क्लासिक डायमण्ड ज्वेलर्सको निम्तोमा नेपाल भ्रमणमा आएकी उनले काठमाण्डौमा आयोजित दुई दिने फेसन सोमा र्याम्पमा उत्रिइन् । शनिवार साँझ फेसन सो समापनसँगै संचारकर्मीसँग कुरा गर्दै उनले नेपालको सौन्दर्य, हिमाल, यहाँको आध्यात्मिक पहिचान र नेपाली मानिसको सौन्दर्यबारे खुलेर तारिफ गरिन् ।
प्रस्तुत छ, सुस्मितासँगको कुराकानीको सम्पादित अंश-
नौ बर्षपछि फेरि नेपाल आउँदा कस्तो लाग्यो ?
-यहाँको असल मानिसको आतिथ्य सत्कारमा उस्तै उत्कृष्टता पाएँ । सवैभन्दा ठूलो पशुपतिको दर्शन गर्ने मेरो धोको पुरा भएको छ । मैले आजै पशुतिको दर्शन गरेँ ।
मलाई यहाँ बोलाएकोमा आयोजक क्लासिक डायमण्डलाई मनैदेखि धन्यवाद । उहाँले मेरो निकै ख्याल गर्नुभयो । मैले यहाँ हरेक पल निकै आनन्दसाथ बिताउन पाएँ ।
नेपाल भ्रमणको सवैभन्दा बिशेष पल कुन रह्यो ?
-सवैभन्दा स्पेशलचाहिं महर्जन परिवार (क्लासिक डायमण्डका संचालक)सँगको र्याम्प नै हो । हजुरआमादेखि बच्चासम्म कति मजाले र्याम्पमा उत्रिनुभयो । म धेरै र्याम्पमा हिडेँ, तर परिवारको तीन पुस्तासँग एकैसाथ र्याम्पमा हिड्ने अबसर जुरेको थिएन् । र्याम्पमा मलाई साथ दिने नेपाली ब्युटीहरुले पनि मेरो मन जिते । ती साँच्चै नेपालको प्रतिनिधित्व गर्ने सुन्दरीहरु हुन् ।
मैले अर्कोपटकको नेपाल भ्रमणमा दुवै जना छोरीहरु (धर्मपुत्रीहरु)लाई ल्याउने छु । नेपालमा हिमालय र एभरेष्ट छ, भगवान छन, यहाँ अध्यात्मिक शक्ति छ, जुन मेरा छोरीहरुलाई पनि महसुस गराउन चाहान्छु ।
तपाई जुन साल मिस युनिभर्स हुनुभयो, त्यही सालबाट नेपालमा मिस नेपाल आयोजना हुन सुरु भएको हो । त्यसयता जति पनि प्रतियोगिताहरु हुन्छन, यो उद्योगमा आउन चाहानेहरुले सुस्मिता सेनलाई एउटा रोलमोडलका रुपमा लिन्छन र फाइनलमा तपाईले दिएको जवाफ युट्युवमा खोजी-खोजी हेर्छन् । नेपाली युवतीहरुलाई के सुझाव छ ?
(पूर्व मिस नेपाल माल्भिका सुब्बाको प्रश्न)
-हो, मसँगै र्याम्पमा उत्रिएका सुन्दरीहरु पनि मलाई भेट्दा निकै उत्साहित र दंगदास थिए, चिच्चाएर मलाई अंकमाल गरे । एउटा सत्य के हो महिला भएर जन्मिनु आफैमा निकै सुन्दर कुरा हो, यो सत्यलाई आत्मसात गर्नुस् । ठूला आँखा भएका, चिउँडो लामो भएका मात्र सुन्दर हुन्छन भन्ने मान्यता थियो कुनै बेला, त्यो ठिक हैन् । आफु जस्तो छ, त्यही नै सुन्दरता हो, त्यसलाई आत्मसात गर्नुस, अरु कोही जस्तो हुनुपर्दैन, अरु कसैले सुन्दरता यो हो भनिरहनु पर्दैन्, यो महसुस गर्ने कुरा हो ।
म मिस युनिभर्स हुँदाको भिडियो हेर्ने गर्नुभएको सुन्दा निकै खुसी लाग्यो । तर, त्यो २० बर्ष अगाडीको कुरा हो । अहिले समय धेरै परिवर्तन भइसकेको छ र, तपाई पनि त्यहीअुनसार परिवर्तन हुनुपर्छ । तपाईको आत्मबिश्वास आजको समय र स्तरअनुसार हुनुपर्छ ।
कस्तो अचम्म रहेछ, म मिस युनिभर्स हुनु र मिस नेपाल प्रतियोगिता सुरु हुनु । गज्जव संयोग !
महिलालाई के ले सुन्दर बनाउँछ ?
-सत्य के हो भने उनले आफु सुन्दर छु भन्ने बिश्वास गर्नुपर्छ । कुनै ब्युटि म्यागेजिनले भनेजस्तो साइज जिरो हुनुपर्छ, यति अग्ली हुनुपर्छ वा संसारका महंगा ब्राण्ड पहिरनुपर्छ भन्ने छैन् । उनी आफैले आफु सुन्दरी भएको महसुस गरे पुग्छ ।
तपाईंले बिबाह चाहिँ कहिले गर्ने ?
-कुनै बेला थियो, जब तपाईले केटीहरुले २४ बर्षमा बिबाह गरेनन् भने उसको जीवन सकियो भन्ने मान्यता थियो । तर भगवानको कृपाले म यस्ता मानिसहरुबाट घेरिएकी छु, जसले भन्छन कि- तिमी यस्तो बेला त्यो काम गर, जुनबेला तिमी तयार भएकी हुन्छौ । त्यो सही समय हो कि हैन भन्ने कुरा छाडिदेऊ ।’ तर, तपाईंहरुले मैलें झैं ढिला गर्नुस् भनेको चाहिं हैन् ।
साँचो कुरा के हो भने म आमा बन्न तयार भएँ तर, श्रीमती बन्न तयार भइन । जुन दिन म श्रीमती बन्न तयार हुने छु, त्यो दिन पक्कै कुनै ह्याण्डसमलाई श्रीमानका रुपमा स्वीकार्ने छु ।
हेर्नुहोस् भिडियो-
महर्जन परिवारको तीन पुस्तासँग एकैसाथ र्याम्पमा उत्रिदै सुस्मिता सेन
तस्विर/भिडियो: श्रीधर पाैडेल, अनलाइनखबर
