सुरेश भुसाल/राजकुमार श्रेष्ठ
२ मंसिर, दाम्बुला (श्रीलंका) । बुधबारबाट पहिलो टी-२० क्रिकेट सेरिज खेल्न लागेको नेपाली टोलीलाई पानीको पीरले सताएको छ ।
टी-२० मान्यता पाएपछि नेपालले पहिलो टी-२० क्रिकेट सेरिज हङकङसँग दाम्बुलामा खेल्दैछ । दुबै टोली दाम्बुला पुगिसकेका छन् । तर, पानीका कारण नेपाली टोली सेरिजको पहिलो टी-२० हुन्छ कि हुँदैन भन्ने चिन्तामा छ ।
मंगलबार नेपाली टोलीले रनगेरी दाम्बुला अन्तराष्ट्रिय क्रिकेट मैदानमा राम्ररी अभ्यास गर्न समेत पाएन । पानी पर्ने र रोकिने क्रम चलिरहेकै बेला नेपाली टोलीले केहीबेर मात्रै अभ्यास गरेको छ ।
‘भोलिको खेल के हुन्छ भन्ने अवस्था छैन’ पानी परेपछि मैदानबाट बाहिरिँदै गर्दा नेपाली टीमका कप्तान पारस खड्काले अनलाइनखबरसँग भने ।
प्रशिक्षक पुबुुदु दशानायकले पनि पानीका कारण मैदानको अवस्था राम्रो नभएको स्वीकार गरे ।
यद्यपि आयोजकसहित नेपाल र हङकङका प्रशिक्षक, कप्तान र टीम म्यानेजरसहितको बैठकले खेल समय ४ बजेसम्म कायम गरेको छ । ‘१ बजे भन्ने थियो तर, पानी पर्न सक्ने भएकाले ४ बजेसम्म खेल खेलाउन सक्ने भन्ने भएको छ’ नेपाली टीम म्यानेजर शैलेश चौधरीले अनलाइनखबरसँग भने ।
हङकङसँग सेरिज खेल्नुअघि नेपालले दुई तीनदिवसीय खेल खेलेको छ । कुरुनेगालामा भएको पहिलो खेल नेपालले ८७ रनले गुमायो भने पानीका कारण प्रभावित श्रीलंका कम्बाइन ११ विरुद्धको खेल पानीकै कारण नेपालले बराबरीमा चित्त बुझाएको छ ।
पारसको खुट्टामा चोट
नेपाली टीममा रहेका १५ सदस्य नै फिट छन् । यद्यपि मंगलबार अभ्यासका क्रममा कप्तान पारसको घुँडामा सानो चोट लागेको छ । क्याचको अभ्यासका क्रममा डाइभ हान्दा उनको घुँडामा चोट लागेको हो ।
पहिलोपटक राष्ट्रिय टोलीमा परेका बलर करण केसी र ब्याट्सम्यान राजेश पुलामी मगरले तीन दिवसीयमा गरेको प्रदर्शनबाट प्रशिक्षक पुबुदु सन्तुष्ट छन् । बलर सोमपाल कामी उत्कृष्ट फममा छन् । उनी तीन दिवसीयको दुबै खेलमा म्यान अफ दि म्याच बने ।
प्रदीप ऐरी र अनिल मण्डल फेरि राष्ट्रिय टिममा फर्कने प्रयासमा छन् । पहिलो टी-२० को फस्ट ११ भने बुधबार बिहान मात्र तय हुने पुबुदुले बताए ।
नेपाल र हङकङवीच हुने सवै खेल (तीनवटा टी-२० र एउटा वान डे) खेलको अनलाइनखबर डटकमले दाम्बुला मैदानबाट लाइभ अपडेट गर्ने छ ।
