१० मंसिर, काठमाडौं । नेपालमा चलिरहेको १८ औं सार्क शिखर सम्मेलनमा भारत र पाकिस्तानको कटुता लुक्न सकेन । सम्मेलनको उद्घाटनका क्रममा केही यस्ता दृश्य देखिए, जसले दुई देशको कटुता प्रष्टै झल्कायो ।
पाकिस्तानी प्रधानमन्त्री नवाज शरिफ सम्बोधनका लागि ड्यासतिर अघि बढ्दा मञ्चमा सरकार तथा राष्ट्र प्रमुखले ताली बजाए । तर, भारतीय प्रधानमन्त्री मोदीले आफ्नो अगाडि रहेको सार्कसम्वन्धी बुकलेट पत्रिका उठाएर र पढेजस्तो गर्न थाले ।
तर, मोदीले बोलिरहँदा नवाजले भने त्यसो गरेनन् । सम्बोधनका लागि मोदी ड्यासमा जाँदा पाकिस्तानी प्रधानमन्त्रीले अन्य सरकार तथा राष्ट्रप्रमुखसँगै ताली बजाए ।
सामान्य स्तरका मानिसले भेट हुँदा मुख फर्काएर नबोली हिँडेजस्तै एउटै कार्यक्रममा जम्काभेट हुँदा पनि दुई नेताले हातसम्म मिलाउने संस्कार देखाएनन् । मुम्बइमा भएको आतंककारी आक्रमण आजकै दिन भएकाले पनि मोदीले पाकिस्तानी प्रधानमन्त्रीसँग हात नमिलाएको टिप्पणी समेत भारतीय सञ्चार माध्यमहरुले गरेका छन् ।
मोदी र सरिफ सोल्टी क्राउन प्लाजामा एउटै होटलभित्र बसेका छन् । त्यहाँ उनीहरुले विभिन्न देशका नेतालाई भेटिरहेका छन् । तर, सार्क मुलुकका दुई शक्तिशाली देशका यी नेताहरु एक-अर्काबाट जोगिएर हिँड्ने गरेका छन् ।
सम्मेलनको उद्घाटन सत्रलाई बंगलादेशकी प्रधानमन्त्री शेख हसिना वाजेदले सम्बोधन गरिरहँदा प्रधानमन्त्री कोइराला र मोदीबीच निकै लामो खासखुस चल्यो ।
सार्कमा आकर्षणको केन्द्र भारतका प्रधानमन्त्री नरेन्द्र मोदीले सबै सहभागीसँग द्वीपक्षीय वार्ता गरे । तर, सीमा जोडिएको पाकिस्तानका प्रधानमन्त्री नवाज शरिफलाई भेट्ने कार्यक्रम मोदीले अहिलेसम्म बनाएका छैनन् ।
सार्कका सदस्य राष्ट्रहरुको अंग्रेजी वर्णानुक्रमअनुसार सीट मिलाइएको थियो । तर, सुशील कोइरालाले अध्यक्षतात्मक सम्बोधन गरेपछि नेपालपछिको वर्णानुक्रममा रहेका नवाज शरीफलाई निम्तो दिइयो । वर्णानुक्रमको अन्तिममा रहेको श्रीलंकाका राष्ट्रपति बोलेपछि पहिलो वर्णानुक्रममा रहेको अफगानिस्तानका राष्ट्रपतिले बोले ।
सम्मेलनका केही दृश्यहरु
तस्वीरः श्रीधर पौडेल/अनलाइनखबर/पीजे क्लब