१० मंसिर, भैरहवा । प्रधानमन्त्री सुशील कोइराला र भारतीय समकक्षी नरेन्द्र मोदीले संयुक्तरुपमा उदघाटन गरेपछि मंगलबार साँझ काठमाडौंबाट दिल्लीका लागि छुटेको बस बुधबार बिहान रुपन्देहीको बेलहिया नाका हुँदै भारत छिरेको छ ।
काठमाडौंबाट आइपुगेको बसलाई दसगजामा नेपाल र भारतका जनता एवं सरकारी अधिकारीले स्वागत गरेका छन् ।
प्रधानमन्त्री सुशील कोइराला र भारतीय समकक्षी मोदीले काठमाडौंमा आ-आफ्नो देशका झण्डा फहराएर शुरु गरेको सार्बजनिक बस सेवा बुधबार बिहानै ३ बजे रुपन्देहीको सीमा नाका बेलहिया पुगेको हो ।
बिहान बेलहिया पुगेको बा ३ ख ४१६९ नम्बरको बसमा रहेका यात्रुहरुलाई भारतीय सीमा सुरक्षा बल एसएसबीका डीआइजी विकास अरोण, भारतीय भन्सारका एनडीसिंह चौलंकी, भारतीय आध्यागमनका प्रमुख अशोक पाण्डे र नेपाल-भारत मैत्री संघ, सुनौली उद्योग संघका पदाधिकारीले दशगजा क्षेत्रमा स्वागत गरे ।
यात्रुहरुको स्वागतपछि भारतीय सीमा सुरक्षा बल एसएसबीले यात्रुहरुलाई बिहानको नास्ता खुवाएर विदाइ गरेका छन् ।
उता दिल्लीमा भारतीय यातायात मन्त्री नितिन गड्करीले सोही समयमा बस सेवा उदघाटन गरेका थिए । दिल्लीबाट डीएलआइएलडी ०७८६ नम्बरको बस काठमाण्डौंका लागि बेलिहया हुँदै काठमाण्डौं पुग्ने बताइएको छ ।
काठमाण्डौबाट दिल्लीका लागि सञ्चालन भएको बस सुनौली, गोरखपुर, लखनउ, आगरा र कानपुर हुँदै दिल्ली पुग्नेछ ।
सरकारले सञ्चालन गरेको सार्वजनिक बसमा यात्रुले काठमाण्डौबाट दिल्ली पुग्न २ हजार २ सय भारतीय रुपैयाँ र बालबालिका लागि १ हजार ५ सय भारतीय रुपैयाँ भाडा तोकेको छ । यो बस यात्रा ३० घण्टाको हुनेछ ।