६ पुस, काठमाडौं । गोरखा फुजेलका कृष्णप्रसाद अधिकारीको हत्यामा संलग्न रहेको आरोपमा पक्राउ परेका रामप्रसाद अधिकारी धरौटीमा छुटेका छन् ।
शनिबार काठमाडौं बालाजुबाट पक्राउ परेका उनलाई प्रहरीले चितवन लगेर जिल्ला अदालतमा पेश गरिएको थियो ।अदालतका मुख्य न्यायाधीश विनोदमोहन आचार्यको इजलासले अधिकारीलाई २७ हजार धरौटीमा छाड्न आदेश दिएको छ ।
अधिकारी गत भदौमा पनि पक्राउ परेका थिए । २५ दिन थुनामा राखेपछि प्रमाण नपुगेको भन्दै सरकारी वकिलको कार्यालयले मुद्दा नै दर्ता नगरी उनलाई छाडेको थियो ।
अदालतले पटक पटक पत्र पठाउँदा पनि हाजिर नभएपछि उनी शनिबार साँझ पक्राउ परेका थिए । प्रहरीले बनस्थली ढुंगेधारास्थित उनकै घरबाट पक्राउ गरेको थियो ।
पूर्वी चितवनको रत्ननगरमा रहेका आफ्ना हजुरबुबालाई भेट गर्न गएका बेला कृष्णप्रसादको २०६१ जेठ २४ गते रत्ननगर १ बकुलहर चोकमा तत्कालिन विद्रोही माओवादी कार्यकर्ताले अपहरणपछि हत्या गरेका थिए ।
गोरखा फुजेलका कृष्णप्रसाद अधिकारीको हत्यामा संलग्न भन्दै दाजु नुरप्रसादले रामप्रसाद र शुभद्रा सहित १३ जना विरुद्ध किटानी जाहेरी दिएका थिए ।
अधिकारी हत्यामा संलग्नलार्इ कारबाही गर्ने माग गर्दै अनसनमा बसेका नन्दप्रसादको निधन भइसकेको छ । उनकी पत्नी अहिले पनि अनसनमै छिन् ।
