१२ पुस, काठमाडौ । क्रिश्चियन धर्मावलम्बीहरुको विशेष कार्यक्रममा बोल्दै उपराष्ट्रपति परामानन्द झाले आफू खाँटी हिन्दुवादी भएको बताएका छन् ।
इसाई धर्मावलम्बीहरुको ठूलो चाड क्रिसमसको अवसरमा शनिबार राजधानीको एक होटलमा आयोजित शुभकामना आदान-प्रदान विशेष कार्यक्रममा बोल्दै उपराष्ट्रपति झाले आफू हिन्दु धर्म मान्ने व्यक्ति भए पनि अन्य धर्मको पनि श्रद्धा गर्ने बताए ।
ख्रीष्टियन महासंघ नेपालले आयोजना गरेको कार्यक्रममा सम्बोधन गर्दै झाले भने- ‘म खाँटी हिन्दु हुँ, इसाई धर्मावलम्बी होइन ।’
प्रभुको कृपाले संविधान पाओस्
आफूलाई खाँटी हिन्दु धर्मावलम्बी दाबी गरेका झाले मुलुकले नयाँ संविधान पाउन प्रभुको पुकारा गरे । उनले भने, ‘प्रभुको कृपाबाट यो नेपालले चाँडै संविधान पाओस् ।’
जुनसुकै धर्ममा पनि श्रद्धापूर्वक सहभागी भइदिएको खण्डमा धर्मप्रतिको आस्थालाई सहयोग मिल्ने झाले बताए । उनले नयाँ संविधान बनाउने कार्यमा शीघ्रता दिन संविधानसभा सदस्य तथा राजनीतिक दलका नेताहरुलाई आग्रह गरे ।
कार्यक्रममा कानूनमन्त्री नरहरी आचार्यले आफूहरुले सबै धर्मको सम्मानकै लागि धर्म निरपेक्ष राज्य घोषणा गरिएको बताए । उनले सबै धर्मलाई समान ब्यवहार गरिने प्रतिवद्धता जनाए ।
