११ माघ, काठमाडौं । सर्वसाधारणको घरमा दैनिक १४ घन्टाका दरले अधोषित लोडसेडिङ भइरहेका बेला हेटौंडा-वीरगन्ज कोरिडरमा नेपाल विद्युत् प्राधिकरणले अनधिकृत रुपमा उद्योगहरुमा २४ सै घन्टा बिजुली आपूर्ति गरेको खुलासा भएको छ ।
प्राधिकरणका कार्यकारी निर्देशक मुकेशराज काफ्लेको नेतृत्वमा प्राविधिक टोलीले शनिबार हेटौंडा क्षेत्रका उद्योगमा गरेको आकस्मिक निरीक्षणका क्रममा तीनवटा ठूला उद्योगले अनधिकृत रुपमा चौबीसै घन्टा बिजुली लिइरहेको पाइएको अन्नपूर्ण पोस्टमा खबर छ ।
काफ्लेका अनुसार शिवम् सिमेन्ट, हेटौंडा सिमेन्ट र त्रिवेणी स्पिनिङ मिलले अनधिकृत रुपमा बिजुली लिएकाले कारबाही गरिएको छ ।
त्रिवेणी स्पिनिङ मिलले ६६ केभीको प्रसारण लाइनबाट डाइरेक्ट ट्यापिङ गरेकाले उक्त उद्योगको लाइन काटिएको काफ्लेले बताए । उसले प्राधिकरणको अनुमतिबिना प्रसारण लाइनबाटै सीधै जोडी ६ मेगावाट बराबरको बिजुली चौबीसै घन्टा उपयोग गर्दै आएका थिए । अनधिकृत रुपमा विद्युत लिनुलाई विद्युत चुहावट नियन्त्रण ऐनअनुसार चोरी मानिन्छ ।
