१२ माघ, काठमाडौ । केही दिनदेखि एक अर्कामाथि सत्तोसराप गर्दै हिँडेका एमाले अध्यक्ष केपी ओली र एमाओवादी प्रचण्डले सोमबार एउटै टेबलमा बसेर चियापान गरे । वार्तामै नबस्ने घोषणा गरेका उनीहरुलाई एउटै टेबलमा बसाउने कामचाहिँ भारतीय दूताबास लैनचौरले गरेको हो ।
भारतको ६६ औं गणतन्त्र दिवसका अवसरमा नेपालस्थित भारतीय दूतावासमा भएको चियापान कार्यक्रममा एमाले अध्यक्ष ओली र एमाओवादी अध्यक्ष प्रचण्ड एउटै टेबलमा बसेर चियापान गरेका हुन् ।
भारतीय दूतावासले जुटाइदिएको अवसरको सदुपयोग गर्दै दुई नेताहरु एउटै टेबलमा बसे पनि उनीहरुले एक अर्कालाई हेराहेर गरेनन् र मुख अर्कैतिर फर्काए ।
सत्तापक्ष र विपक्षका नेताहरु बाउँठिएर हिँडिहेका बेला भारतीय गणतन्त्र दिवसको अवसर पारेर नेताहरुलाई एकै ठाउँमा जुटाउन मुख्य भूमिका खेल्ने भारतीय राजदूत रे पनि दुई नेताहरुसँगै बसेका थिए ।
दूतावासको चियापानमा प्रधानमन्त्री सुशील कोइराला र एमाओवादी अध्यक्ष प्रचण्ड पनि एकैछिन नजिकएका थिए, तर करिब ३० सेकेन्डमै उनीहरु तर्किए ।
एउटै टेबुलमा बसेर चियापान गरेका एमाले अध्यक्ष ओलीले पार्टी उपाध्यक्ष विद्या भण्डारीलाई र एमाओवादी अध्यक्ष प्रचण्डले पार्टी उपाध्यक्ष डा. बाबुराम भट्टराईलाई साक्षी किनारा राखेको देखिन्थ्यो ।
भारतीय राजदूतसँगै एउटै मेचमा रहेका उनीहरुसँग कांग्रेस सभासद अमरेशकुमार सिंह पनि थिए ।
भारतको गणतन्त्र दिवसका अवसरमा दूतावासले आयोजना गरेको उक्त चियापान कार्यक्रममा प्रधानमन्त्री सुशील कोइरालाका साथै विभिन्न दलका नेता, कुटनीतिक नियोगका प्रमुखहरुको उपस्थिति थियो ।