जादुगरहरुले मुख तथा जिउका अन्य भागमा विभिन्न खाले केमिकल्स हालेर कृत्रिम आगो निकालेको त हामीले देखेकै छौँ । कोही मानिसको सरीरबाट साँच्चीकै आफै आगोको ज्वाला निस्केको भने अहिलेसम्म सुनिएको वा देखिएको थिएन । तर भारतमा एक जना बच्चाको जिउबाट भने आफै आगोको ज्वाला निस्किरहेको छ ।
भारतको चेन्नइ सहर नजिकै पर्ने वेल्लपुरम गाउँमा एक बच्चाको जिउबाट आगोको ज्वाला निस्कन थालेपछि सबै आश्चर्यमा परेका छन् ।
राहुल नामका ती बालकका अभिभावकले आफ्नो छोरा जन्मिएको ९ दिनदेखि नै उसको जिउबाट आफै बेलाबेलामा आगो बल्न थालेको दाबी गरेका छन् । ती बालकको जन्म गएको जनवरी ९ तारेखमा भएको थियो ।
ती बालकको सरीरमा विभिन्न ठाउँमा जलेका खत तथा घाउ छन् । के कारणले गर्दा उनको सरीरमा आगो निस्केको हो भन्ने विषयको कारण भने डाक्टरहरुले पनि पत्ता लगाउन सकेका छैनन् ।
ती बालकको सरीरको छालाबाट निस्कने ग्यासको कारण त्यसरी आगो निस्केको हुनसक्ने अनुमान गरिएको छ । तथापि यसको खास कारण पत्ता लगाउन डाक्टरहरुले अनुसन्धान गरिरहेका छन् ।
उक्त बच्चालाई किलपाल मेडिकल कलेज अस्पतालमा विशेष निगरानीमा राखेर उपचार सुरु गरिएको छ । अस्पतालको आइसियुमा चौबिसै घण्टा स्वचालित क्यामराबाट बच्चाको निगरानी सुरु गरिएको छ । उक्त बच्चाको उपचार तथा जल्नुको कारण पत्ता लगाउन ५ जना डाक्टर खटिएका छन् ।
