नेपाली चलचित्र क्षेत्रकी पुरानी एवं चर्चित कलाकार लक्ष्मी गिरीलाई नेताले यती लामो समय पाउँदा पनि संविधान नबनाएपछि खुबै रिस उठेको रहेछ ।
उनले संबिधान बनाउन नचाहाने मुख्य चार नेताको पनि पहिचान गरिसकेकी छिन् । प्रधानमन्त्री एवं नेपाली कांग्रेसका सभापति सुशिल कोइराला, एमाले अध्यक्ष केपी ओली, एमाओवादी अध्यक्ष प्रचण्ड र मधेसी मोर्चाका संयोजक विजय गच्छदार संबिधानका लागि मुख्य बाधक रहेको उनको ठहर छ ।
अनलाइनखबरसँग गफिदै लक्ष्मीले चारै जना नेतालाई असक्षम नेताको पगरी गुथाउने नयाँ आइडिया सुनाइन् ।
उनको चाहना चारै जना नेतालाई भित्री बस्त्र मात्र लगाएर संविधान सभामा नाचुन् भन्ने छ । यसका लागि उनी चार नेतालाई सितारा र पोते जडित पेन्टी उपहार दिन चाहन्छिन् ।
‘जनतालाई ग्यास छैन, विजुली छैन, देशमा संविधान छैन । यी सबै नेता असक्षम भए ।’ लक्ष्मीले भनिन- ‘कसैले मलाई संविधान सभामा जान दिन्छ र सुरक्षा दिन्छ भने म चार नेतालाई पेन्टी उपहार दिन्छु ।’
नेताहरु नाच्ने गीतको पनि टुंगो लगाइसकेकी छिन लक्ष्मीले । चर्चित हिन्दी फिल्म गीत ‘मुन्नी बदनाम हुई’ मा ४ नेताले नाच्नुपर्ने उनको सुझाव छ ।
यस्तो बुढेशकालमा यति उटपट्याङ कुरा गर्न डर लाग्दैन ? देशका लागि त्याग गर्ने बेला भएकाले आफुलाई कुनै डर नलागेको बताइन् । उनले भनिन्, ‘मैले पति, सन्तानदेखि जीवनका हरेक सुख र दुःखको अनुभव लिइसकें । अब मलाई डर किन लाग्छ र ?
करिनाले नाच्दा ग्ल्यामर, नेपालीले नाच्दा भल्गर ?
लक्ष्मी गिरीले अर्को कुरामा पनि आपत्ती जनाइन् । कपुर खानदानकी चर्चित नायिका करिना कपुरले ‘चिपकाले शैया फेबिकोलसे’ बोलको गीतमा नाचेको पनि उनलाई चित्त वुझेको छैन ।
उनले भनिन्-‘भारतदेखि विश्वमै चर्चित बनेकी एक नायिकाले यस्तो गीतमा नाच्न सुहाउँछ । उनका आफन्त, परिवारले के भन्लान् ? करोड लिएर नाँचे त्यो ग्ल्यामर हुन्छ । नेपालका नायिकाले यस्तै गीतमा नृत्य गर्दा भल्गर भयो ?
उनले थप आक्रोश पोख्दै भनिन- नेपाली चलचित्रमा पैसा छैन, नायिकाहरु हजारमा पनि नाँच्छन् यसैले यो भल्गर भनिन्छ । छोटो लुगा लगाउनु भल्गर हैन ।’
