१५ माघ, काठमाडौं । एकीकृत नेकपा माओवादीका वरिष्ठ नेता डा. बाबुराम भट्टराईले शान्ति र संविधानको कार्यनीति फेल नभएको बताएका छन् ।
तर, माघ ११ गते संविधानसभा अपहरण भएर यथास्थितिवादी र प्रतिगामीको हातमा पुगेको उनको निष्कर्ष छ । उनले भने-‘कार्यनीति नै गलत थियो भन्ने म ठान्दिन, अहिले पनि नेपालीको निम्ति संविधानसभाबाट संविधान बन्नु नै हितकारी हुन्छ ।’
संविधानसभा जनताबाट यथास्थितिवादी शक्तिहरुको हातमा पुगेको भन्दै एमाओवादी नेता भट्टराईले त्यसलाई खोसेर लिन जनता सफल हुन्छन् कि हुँदैनन् भन्नेमा भर पर्ने बताए । रिपोर्टस क्लबले आयोजना गरेको साक्षात्कार कार्यक्रममा नेता भट्टराईले भने-‘जनताले अझै पनि खोसेर ल्याउन सक्ने सम्भावना म झिनो देख्छु तर, त्यसको निम्ति ठूलै संघर्षको आवश्यकता म देख्छु ।’
एमाओवादी नेता भट्टराईले बहमतीय प्रक्रियामा प्रवेश गरेपछि वार्ताको केही औचित्य नभएको बताए । उनले भने-‘माघ ११ गते बलजफ्ती गरिएको निर्णयलाई उहााहरुले फिर्ता लिनुपर्छ । त्यसपछि निःशर्त ढंगले फेरि वार्तामा बसौं भनेर वातावरण बनाउनुपर्छ । तर बलमिच्याईंपूर्ण तरिकाले प्रक्रिया अगाडि बढाउने अनि वार्ता गरौं भन्नु त ‘आत्मसमर्पण गर्न आइज’ भनेजस्तो हुन्छ ।’
सत्तापक्षले विगतका सहमति तोडेर संख्याको बलमा संविधान जारी गर्छु भन्ने मुढेबल प।दर्शन गरेकाले आन्दोलनको विकल्प नभएको उनले बताए । उनले भने-‘अझै पनि सत्तामा रहेकाहरुले हिजोका शासकहरुले जस्तो दम्भ प्रदर्शन नगरिकन देश फेरि द्वन्द्व र मुठभेडको दिशामा नजाओस् भनेर पहल गर्छन्, आफ्नो कमिकमजोरी सच्याउँछन् भने त म सम्भावना अझै पनि देख्छु ।’
संविधानसभामार्फत अग्रगामी संविधान बनाउन आफूले पहल गर्ने भन्दै सम्वाद समितिका सभापति भट्टराईले बल सत्ता पक्षको कोर्टमा रहेको बताए । उनले भने-मैले प्रष्टसाथ भन्नैपर्छ स्थिति अब धेरै जटील बनेको छ । अब बल सत्तापक्षको कोर्टमा पुगेको छ । उनीहरुले कत्तिको सुझ-बुझका साथ आफ्नो कदम चाल्छन् ।’
पहिलो चरणको आन्दोलन अन्तरगत फागुन १६ गतेसम्म संविधानसभा र संसद्का सबै बैठक बहिष्कार गर्ने निर्णय गरिएको भट्टराईले बताए । उनले भने-‘सधैंका लागि संविधानसभा छोड्ने भनेको होइन ।’