१८ माघ, कावासोती । नवलपरासीको कावासोती नगरपालिका २ का होटल व्यवसायी दिपेन्द्र पाण्डेको हत्या भएको छ ।
मनकामना होटलका सञ्चालक २८ वर्षीय पाण्डेको जिल्लाकै देउराली गाविस २ को जंगलमा शव फेला परेको छ ।
शनिबार साँझदेखि हराइरहेका पाण्डे आइतबार विहान १० बजेतिर जंगलमा मृत फेला परेका हुन् ।
घाँटीमा धारिलो हतियारले प्रहार गरेको अवस्थामा शव फेला परेकोले हत्या नै भएको प्रारम्भिक अनुसन्धानबाट खुलेको इलाका प्रहरी कार्यालय नवलपुरका प्रहरी नायव उपरीक्षक नवराज अधिकारीले बताए ।
अधिकारीले घटनाको अनुसन्धान भईरहेको र थप अनुसन्धानका लागि पोखराबाट कुकुर मगाइएको जानकारी दिए ।
उनका अनुसार डण्डा र चोरमाराको बीच जंगलमा पर्ने ४० किलोमिटर भन्ने ठाउँबाट उत्तरतर्फको थुम्किदेवी सामुदायिक वनमा शव फेला परेको हो । प्रहरीले घटनास्थलबाट शव उठाएको छैन ।
लजमा महिलाको मृत्यु, श्रीमान् फरार
यसैबीझ मोरङको उर्लाबारी नगरपालिका–६ स्थित सफल लजमा आइतबार बिहान एक महिला मृत अवस्थामा फेला परेकी छन् ।
इलामको मोहमाई–४ बस्ने २८ वर्षीया मञ्जु दर्जी मृत अवस्थामा फेला परेको इलाका प्रहरी कार्यालय उर्लाबारीले जनाएको छ ।
उनी विगत एक वर्षदेखि आफना पति बुद्धिमान मगरसँग बस्दै आएकी थिइन् । घटनास्थलमा प्रहरी पुग्नासाथ मगर फरार भएको प्रहरीले जनाएको छ । उनको खोजी भइरहेको छ ।