१८ फागनु, म्याग्दी । म्याग्दीका उच्च पहाडी क्षेत्रमा आइतबार दिउँसोदेखि बाक्लो हिमपात भएको छ ।
जिल्लाका गुर्जा, मुदी, लुलाङलगायत क्षेत्रमा बिहानैदेखि पानी परेको र पानीसँगै हिमपात पनि भएपछि जनजीवन प्रभावित बनेको मुदीकी सामाजिक परिचालिका एजिना रोकाले जानकारी दिए ।
म्याग्दीलगायत धौलागिरि अञ्चलका चारवटै जिल्लामा आइतबार विहानदेखि वर्षा भइरहेको छ । उच्च पहाडी क्षेत्रमा हिमपात भएपछि चिसो बढेकाले वृद्धवृद्धा र पशु चौपायालाई समस्या भएको स्थानीयवासीले बताएका छन् ।
गुर्जाको लेकमा बाक्लो हिमपात भइरहेको छ । पानी परेपछि गहुँलगायत हिउँदेबाली राम्रो हुने हुँदा तल्लो भेगका कृषक भने खुसी भएका छन् । रासस
