नायिका, मोडल तथा पूर्व मिस नेपाल झरना बज्रचार्यले केही दिन अगाडि बिहे गरिन् । भारतीय मुलका मलेसियन नागरिक राहुल अग्रवालसँग उनले बिहे गरेकी हुन् । बिहे गरेपछि झरना र राहुल मुस्ताङ, जोमसोमममा हनिमुन मनाएर पनि फर्किसकेका छन् । उनीहरु अब १५ दिन भित्र मलेसियातर्फ लाग्दैछन् । बिहे गरेपछि नायिका झरना बज्रचार्यले अनलाइनखबरसँग कुरा गर्दै आफ्नो योजना यसरी खुलाएकी छिन् ।

बिहे नहुँदा पनि सक्रिय थिइन्
मैले चलचित्र क्षेत्र र म्यूजिक भिडियोको दुनियाँलाई चटक्कै माया मार्न सक्दिन । जसका कारण पनि राम्रो कथावस्तु आएको खण्डमा नेपाल आएको समयमा चलचित्र गरिहाल्छु । म म्यूजिक भिडियो त भोली नै एउटा गर्दैछु ।

तर, पनि बिहे भएपछि मानिसको दिनचर्या र शैली त बदलिहाल्छ । फेरि, श्रीमान्को घरमा गएपछि त सबै कुरा आफूले भनेजस्तो पनि कहाँ हुन्छ र । फेरि, म मलेसियामा रहने भएकाले पनि पहिलो जस्तो चलचित्र र भिडियोमा सक्रिय हुन सक्दिन । मैले बिहे अगाडि पनि खासै धेरै चलचित्र र भिडियो कहाँ गरेको थिएँ र ?

नेपाल त मिस भैहाल्छ नि !
जब म कहिलेकाही कार्यक्रमका लागि देश बाहिर जान्थे, तब मात्र नेपालका साना-साना कुराहरु मिस हुन्थे । मेरो आमा-बुबा र परिवार नै यही भएकाले मलाई यहाँको माया लागिहाल्छ ।

यहाँको जस्तो त बाहिर गएर कहिले पनि हुन्छ जस्तो लाग्दैन मलाई । तर, पनि हाम्रो समाजमा बिहे भैसकेपछि श्रीमान्सँग बस्नुपर्ने चलन छ । यसैले पनि म श्रीमान्सँग नै रहन्छु ।

मलेसियामा ध्यान केन्द्र चलाउँछु
मैले अहिले पनि नेपालमा ध्यान केन्द्र नै चलाइरहेको छु । मलेसिया पुगेर पनि म यसलाई निरन्तरता दिन्छु । मलेसियामा पनि मेरो ध्यान केन्द्र संचालनमा आउनेछ । साथमा श्रीमान्को व्यवसायलाई पनि निरन्तरता दिन्छु । अरु त हेर्दै जाउँ न के-के हुन्छ ।

किन रोज्नु भयो राहुललाई ?
मलाई थाहा छैन मैले  बिहेका लागि राहुललाई किन रोजेको हो । तर, पनि हाम्रो विचार मिल्यो, परिवार मिल्यो र बिहे भयो । जब, उहाँले चलचित्र ‘सेफ ल्याण्डिङ’को  निर्माण गर्नुभयो, त्यती नै बेला हाम्रो भेट भएको हो ।

यसपछि हामी नजिकका साथी भयौ । पछि, हाम्रो विचार र मन मिलेपछि हामी सम्बन्धमा रहन गयौ  र केही समयपछि बिहे गर्ने निर्णय गर्‍यौ ।

हनिमुन कस्तो भयो ?
मेरो लागि यो जिवनकै एक अविस्मरिणय क्षण हुन पुग्यो । म त धेरै पटक जोमसोम र मुस्ताङमा गएको थिएँ । तर, राहुल कहिले पनि जानु भएको थिएन । जसका कारण  पनि हाम्रो योजना त्यता नै जाने भयो । हनिमुनका लागि नेपालको रमाइलो स्थल पुग्दा राहुल र म दुबै एकदमै खुशी भयौ । हामीले त्यहाँ रमाइलो पल बितायौ ।