पुष्प दुलाल
१७ चैत, मलेसिया । विकासको तिब्र रफ्तारमा अगाडि बढिरहेको मुलुक मलेसियामा नेपालीहरु श्रम गर्न मात्र होइन, भ्रमणका लागि समेत जाने गर्छन् ।
मलेसियामा वर्षेनी लाखाैं नेपालीहरू घुम्न जाने गरेको मलेसियाको सरकारी तथ्यांकले देखाएको छ । तथ्यांकले मलेसियाको पर्यटनमा नेपालीहरुको योगदान उच्च रहेको स्पष्ट पार्छ । पर्यटन र पाम आयल मलेसियन अर्थतन्त्रको मूख्य मेरुदण्ड हो ।
मलेसियाको पर्यटन हेर्ने सरकारी निकाय टुरिजम मलेसियामा अनुसार सन् २०१४ मा मलेसिया घुम्न जाने मुख्य २० देशमध्ये नेपाल १७औं स्थानमा परेको छ ।
टुरिजम मलेसियाका अनुसार सन् २०१४ मा एक लाख ५९ हजार १ सय ४४ जना नेपालीहरु पयर्टक भिषामा मलेसिया आएका छन् । मलेसियाले २०१४ लाई ‘भिजिट मलेसिया-२०१४’ का रुपमा मनाएको थियो ।
तर, मलेसियाबाट नेपाल भ्रमणमा जाने पर्यटक भने नगन्य रहेका छन् । नेपाल पर्यटन बोर्डका अनुसार सन् २०१४ मा १६ हजार ६ सय ७ जना मलेसियन पर्यटक नेपाल भ्रमणमा गएका थिए ।
मलेसिया र नेपालबीच पुरानो सम्बन्ध भएको हुँदा धेरै नेपालीहरु मलेसिया भ्रमणमा आउने गरेको टुरिजम मलेसियाकी अन्तराष्ट्रिय पर्यटन प्रवर्द्धन विभाग अधिकृत सलिमाह मादअली बताइन । नेपालीहरु बिदा मनाउन र सपिङका लागि मलेसिया आउने गरेको उनको भनाई छ ।
मलेसिया घुम्न जाने कुन देशका कति ? (सन् २०१४ मा)
| देश | पर्यटक |
|---|---|
| सिंगापुर | १३९३२९६७ |
| इन्डोनेसिया | २८२७५६७ |
| चीन | १६१३३५५ |
| थाइल्याण्ड | १२९९२९८ |
| ब्रुनाई | १२१३११० |
| भारत | ७७०१०८ |
| फिलिफिन्स | ६१८५३८ |
| अष्ट्रेलिया | ५७१३२८ |
| जापान | ५५३१०६ |
| बेलायत | ४४५७८९ |
| दक्षिण कोरिया | ३८५७८९ |
| भियतनाम | २८५७१६ |
| ताइवान | २७४६६४ |
| अमेरिका | २६२१०५ |
| ब्ंगलादेश | २०४४१८ |
| फ्रान्स | १६९९७३ |
| नेपाल | १५९१४४ |
| जर्मनी | १५८४५३ |
| साउदी अरेबीया | ११३९२१ |
| नेदरल्याण्ड | ९७९८८ |
स्रोत : टुरिजम मलेसिया
पछिल्लो समय नेपाली ठूला कर्पोरेट हाउसका मिटिङ, सेमिनार तथा वाषिर्क सभाहरु समेत विदेशमा हुन थालेका छन् । विदेशमा बैठक गर्ने कर्पोरेट हाउसहरुले मलेसिया, बैंकक, दुबई, सिंगापुर लगायतका मुलुकलाई गन्तव्य बनाउने गरेका छन् ।
‘पहिले धेरै नेपालीहरु बि्रटिस आर्मीको रुपमा मलेसियामा कार्यरत हुनुुहन्थ्यो, अहिले धेरै नेपालीहरु श्रमिकका रुपमा कार्यरत हुनुहुन्छ’ मादअलीले भनिन्- ‘नेपाल र मलेसियाबीच लामो सम्बन्धले पर्यटनमा पनि सहयोाग पुर्याएको छ ।’
मलेसिया पछिल्लो समयमा विकसित भएको देश भएकाले यहाँको विकास हेर्न पनि धेरै नेपालीहरु आउने गरेको गैरआवासीय नेपाली संघ मलेसियाका अध्यक्ष शंकर बहादुर पौडेलले जानकारी दिए ।
‘धेरै नेपालीहरु यहाँको विकास हर्न पनि आउने गर्छन’ पौडेलले भने -त्यसो त पछिल्ला वर्षहरुमा मलेसियाको समग्र पर्यटन उद्योग नै बढिरहेको छ ।’
मलेसिया नेपालको मुख्य श्रम गन्तव्य हो । हाल सात लाखको हाराहारीमा नेपालीहरु मलेसियाको श्रम बजारमा कार्यरत छन । चालू आर्थिक वर्षको आठ महिनामा डेढ लाख नेपाली रोजगारीका लागि मलेसिया गएको श्रम तथा रोजगार विभागले जनाएको छ ।
सिंगापुरबाट सबैभन्दा धेरै पर्यटक मलेसिया घुम्न आउने गरेका छन् । सिंगापुरबाट सन् २०१४ मा एक करोड ४० लाख पर्यटक मलेसिया भित्रिएका छन् । दोस्रोमा इन्डोनेसिया रहेको छ । जहाँबाट २८ लाख २७ हजार पर्यटक मलेसिया घुम्न आएका थिए । तेस्रोमा चीन रहेको छ भने चौथोमा थाइल्याण्ड छ ।
