१८ चैत, काठमाडौं । उपचार गर्ने डाक्टरहरु नै हड्तालमा उत्रिएपछि उपचारका लागि अस्पताल गएका विरामी र तीनका आफन्तहरुको बिचल्ली भएको छ ।
नयाँ मेडिकल कलेजलाई सम्बन्धन दिन नहुने लगायतका माग राखेर अनसनमा बसेका डा. गोविन्द केसीको माग पूरा गराउन नेपाल चिकित्सक संघको आह्वानमा देशभरका निजी तथा सरकारी अस्पतालका ओपिडी सेवा बन्द छन् ।
निजी अस्पतालमा बन्दको प्रभाव नपरे पनि गरीव जनताको पहुँचमा रहेका सरकारी अस्पतालहरुको आकस्मिक बाहेक सबै सेवा बन्द भएपछि विरामीको बिचल्ली भएको हो ।
अनलाइनखबरकर्मी देशकै जेठो र ठूलो सरकारी अस्पताल वीर अस्पतालमा पुग्दा बिभिन्न ठाउँबाट उपचारका लागि आएका विरामी अस्पताल परिसरमै अलपत्र थिए ।
‘एउटा व्यक्तिको माग पूरा गराउन गरीवको उपचार नै रोक्नु डाक्टरको पेशाले दिन्छ ?’ वैशाखीको सहारामा वीर अस्पताल पुगेका एक विरामीले भने, ‘हामीले के अपराध गरेका थियौं र सजाय दिएका ?’
टिकट काट्ने ठाउँमा विरामीको लाइन लागे पनि उनीहरुले सेवा पाउन सकेनन् । कतिपय विरामी र तीनका आफन्त काठमाडौंमा खाने बस्ने ठाउँ समेत नभएको र अस्पतालले भर्ना नलिएको भन्दै बन्दो बस्तीका सामान सहित अस्पताल परिसरमै बिलौना गरिरहेका थिए ।
तस्वीर : कविन अधिकारी/अनलाइनखबर