काठमाडौ । दीवंगत अभिनेता श्रीकृष्ण श्रेष्ठकी पत्नी श्वेता खड्का पीडाबाट उठेर सामान्य जीवनमा फर्किन कोसिस गर्दैछिन् । पति बियोगमा परेयता लामो समय ओछ्यानमै रहेकी श्वेता यतिबेला पुरानै जीवनमा फर्किन थालेकी छिन् ।
आजकल श्वेताको अनुहारमा मुस्कान देखिन थालेको छ । आफैले अभिनय गरेको चलचित्र ‘कोहिनुर’ प्रदर्शनका लागि अमेरिका गएकी श्वेता अमेरिकामा रहेका नेपालीसंगको जमघटमा रमाउन थालेकी छिन् ।
‘कोहिनुर’ प्रदर्शनकै लागि श्वेतासँगै अमेरिका गएका नृत्य निर्देशक बसन्त श्रेष्ठले श्वेतामा पहिलेको तुलनामा थोरै परिवर्तन आएको बताए ।
‘अनुहारमा हाँसो देखिन थालेको छ, हामीसँग रमाएर कुरा गर्न थालेकी छिन् ।’ नृत्य निर्देशक श्रेष्ठले भने ।
निर्देशक श्रेष्ठलाई श्वेताले गुरु मान्ने गरेकी छिन् । श्रेष्ठको पुतलीसडकमा रहेको डान्स सेन्टरमा नृत्य सिक्दा सिक्दै श्रीकृष्णले श्वेतालाई नायिका बनाएका थिए ।
अमेरिकामै बस्दै आएका नायिका ऋचा घिमिरे, पूजा चन्द, सारंगा श्रेष्ठ, उषा पौडेल निर्देशक शंकर घिमिरे लगायतका कलाकारसँग पनि उनको केही दिनअघि भेटघाट भएको थियो ।
केही शहरमा फिल्म प्रदर्शन बाँकी नै भएकाले नेपाल आउन केही दिन लाग्ने भएको छ । श्रीमानको निधनपछि बिरामी परेकी श्वेता औषधि सेवनकै कारण केही मोटाएकी छिन् ।
