संभवत नेपाली चलचित्र क्षेत्रमा कुनै चलचित्रको अडियो बिमोचनमा यती धेरै कलाकार सहभागी भएका थिएनन् । सोमबार बेलुकी चलचित्र ‘अधकट्टी’को बिमोचन समारोहमा देखियो यस्तै दुर्लभ दृश्य ।
सुव्रत आचार्यको निर्देशनमा तयार भएको यो चलचित्रको अडियो बिमोचनमा नेपाली चलचित्रका क्षेत्रका पुरानादेखि नयाँ नायिकासम्म देखिए । नायिका करिश्मा मानन्धर, झरना थापा, दिपाश्री निरौलादेखि अहिलेका नायिका प्रियंका कार्की, निता ढुंगाना, नम्रता श्रेष्ठ, शिल्पा पोख्रेल, ऋचा शर्मा, हर्षिका श्रेष्ठले चलचित्रको एल्बम बिमोचन संयुक्त रुपमा गरे ।
बसन्त सापकोटाले संगीत भरेका चलचित्रका गीतहरुले दर्शकको मन छोएका छन् । चलचित्रको ‘ कोकाकोला फिगर’ बोलको गीत अहिले सर्वाधिक चर्चामा छ ।
द्धारिक उदय फिल्मस्को प्रस्तुतीमा तयार भएको यो चलचित्रमा विल्सन विक्रम राई, अशिष्मा नकर्मी, रिस्ता बस्नेत, गौरव पहारी, प्रदिप बाँस्तोलाको साथमा विशेष भूमिकामा नम्रता श्रेष्ठ र गजित बिष्टले अभिनय गरेका छन् । 
चलचित्रको अडियो बिमोचनमा मुख्य कलाकारहरुले ४ वटा गीतमा नृत्य पनि गरे । कलाकारको नृत्य र फरक शैलीको कार्यक्रमले धेरैलाई मनोरञ्जन र फरकपन दिएको थियो । जेठ ८ गतेबाट प्रदर्शनमा आउने यो चलचित्र पूर्णतया कमेडी बिषयमा तयार भएको छ ।
एलइडी पर्दामा आकर्षक स्टेज तयार पारेर बनाइएको अडियो बिमोचन रोचक र भव्य देखियो ।
